İdman.biz
Paris-2024 Yay Olimpiya Oyunlarının güləş yarışları davam edir.
İdman.biz xəbər verir ki, bu gün daha iki çəkidə mübarizə aparan sərbəst güləşçilər xalçaya çıxacaq.
Azərbaycan millisinin iki pəhləvanı da yarışa start verəcək. Turan Bayramov (74 kq) və Giorgi Meşvildişvili (125 kq) sabah keçiriləcək həlledici qarşılaşmalara vəsiqə üçün mübarizə aparacaq.
Sərbəst güləş
74 kq
Turan Bayramov mübarizəyə 1/8 finaldan başlayacaq. Avropa çempionatlarının üçqat mükafatçısı ilk qarşılaşmada albaniyalı Çermen Valiyevlə görüşəcək.
125 kq
Giorgi Meşvildişvili də 1/4 finala vəsiqə üçün mübarizə aparacaq. Qitə çempionatlarında iki bürünc qazanmış təmsilçimizin ilk rəqibi misirli Diaeldin Abdelmottaleb olacaq.
Qeyd edək ki, Parisə 6 idmançı ilə yollanan sərbəst güləş millimizin təmsilçilərindən Əliabbas Rzazadə (57 kq) və Osman Nurmaqomedov (86 kq) Olimpiada ilə vidalaşıb, Hacı Əliyevlə (65 kq) Maqomedxan Maqomedov (97 kq) sabah xalçaya çıxacaq.
İdman.biz
