İdman.biz
Paris-2024 Yay Olimpiya Oyunları başa çatıb.
İdman.bizin XXXIII Olimpiada ilə bağlı reytinqi özünü böyük ölçüdə doğruldub.
İyunun 26-da açıqladığımız "Qızıl ümidlər - İDMAN.BİZİN REYTİNQİ"ndə (https://www.idman.biz/az/news/paris-2024/33636) yer alan 5 favoritimizin hamısı Fransa paytaxtında fəxri kürsüyə qalxıb.
Cüdoçular Hidayət Heydərovla (73 kq) Zelim Kotsoyev (100 kq) bütün rəqiblərinə qalib gələrək qızıl medal qazanıblar. "Qızıl ümid" olduqlarını təsdiqləyən tatamı ustalarımızın ikisi də Fransa paytaxtında Azərbaycanın himnini səsləndirib.
Boksçu Alfonso Dominqes (92 kq) də buna yaxın olub. Qızıl gözlədiyimiz idmançı çempionluğu həlledici görüşdə əldən verərək gümüşlə kifayətlənib.
Fəxri kürsünün ən yüksək pilləsinə qalxacağını proqnozlaşdırdığımız digər iki idmançı ümidləri tam olmasa da, müəyyən dərəcədə doğruldub. Düzdür, yunan-Roma güləşçisi Həsrət Cəfərov (67 kq) və sərbəst güləşçisi Maqomedxan Maqomedov (97 kq) qızıl qazana bilməyiblər. Amma Parisdən əliboş da dönməyəcəklər. Hər iki pəhləvan fəxri kürsüdə üçüncü yerdə dayanıb.
Qeyd edək ki, yığmamız ümumilikdə 7 mükafat əldə edib. "Qızıl beşlik"dəki beş medalçıdan başqa, taekvondoçu Qaşım Maqomedovla (58 kq) gümüş, sərbəst güləşçi Giorgi Meşvildişvili (125 kq) bürünc qazanıb.
Vüqar Xeyrullayev
İdman.biz
