Idman.biz
Ölkələr arasında sərhədlərin getdikcə şəffaflaşdığı müasir idman dünyasında idmançıların öz sevgilərini ölkələrindən kənarda tapmaları qeyri-adi deyil.
İdman.biz xəbər verir ki, zəngin mədəniyyətə və ənənələrə malik Azərbaycan idman mühitində də bir çox beynəlxalq ailə birliklərinin vətəni olub.
Azərbaycanla əlaqəli bəzi beynəlxalq "idman" cütlüklərinə nəzər salaq.
Anatole Abanq və Adelia Hacıyeva
Futbol ürəkləri birləşdirir: "Şamaxı" (keçmiş "Keşlə") futbol klubunun kamerunlu sabiq hücumçusu Anatole Abanq taleyini azərbaycanlı Adelia Hacıyeva ilə bağlayıb. Onların iki fərqli mədəniyyəti birləşdirən toy şənlikləri həm Bakıda, həm də idmançının vətəni Kamerunda keçirilib.
Alfonso Dominges və Nigar
Döyüş dünyasında da güclü ailələr qurulur. Kubalı boksçu, 2024-cü il Olimpiya Oyunlarının gümüş mükafatçısı Alfonso Dominges xoşbəxtliyini Nigar adlı azərbaycanlı qadınla tapıb.
Zeynəb Cavadlı və Şeyx Səid Əl-Məktum
Azərbaycan gimnastı, beynəlxalq dərəcəli idman ustası Zeynəb Cavadlı və Dubay əmirinin qardaşı oğlu Şeyx Səid Əl-Məktumun evliliyi də diqqət çəkir. Amma təəssüf ki, bu evlilik uzun sürməyib, cütlük qalmaqalla ayrılıb.
İrina Kindzerskaya və Həmid Əliyev
Tokio Olimpiadasında bürünc medal qazanan Ukrayna əsilli cüdoçumuz İrina Kindzerskaya azərbaycanlı Həmid Əliyevlə ailə qurub.
Valentin Xristov
Bolqarıstan əsilli ağır atlet, ikiqat Avropa çempionu Valentin Xristov da həyat yoldaşını Azərbaycandan seçib.
Pourya Yazdanpanah
İranlı voleybolçu Pourya Yazdanpanah 15 ildən çoxdur Azərbaycanda yaşayır, burada ailə həyatı qurub və iki uşaq böyüdür.
Tatyana Deniskina və Rüfət İsmayılov
2000-ci illərin əvvəllərindən Bakıda yaşayan basketbolçu Tatyana Deniskina azərbaycanlı cüdo məşqçisi Rüfət İsmayılovla ailəlidir və onların qızı Angelina Azərbaycanın basketbol yığmasında oynayaraq ailənin idman ənənələrini davam etdirir.
Anastasiya Şvabauer və İbrahimli
Qazaxıstanlı ağır atlet, gənclər arasında dünya çempionu Anastasiya Şvabauer isə İbrahimli soyadlı azərbaycanlı ilə ailə qurduqdan sonra beynəlxalq yarışlarda ölkəmizi təmsil etməyə başlayıb. Daha sonra dopinqə görə dörd il müddətinə diskvalifikasiya olunub. Məcburi fasilə bitdikdə böyük idmana qayıdıb və hazırda Mum soyadı ilə çıxış edir.
Azərbaycanı Anastasiya İbrahimli adı ilə təmsil etmiş idmançı 2015-ci ildə 23 yaşadək qızlar arasında Avropa çempionu olub, 2017-ci ildə Bakıda keçirilən İslam Həmrəyliyi Oyunlarında isə qızıl medal qazanıb.
Lamiyə Vəliyeva və Thembo Monareng
Taleyini cənubi afrikalı idmançı Thembo Monarenglə bağlayan ikiqat Paralimpiya çempionu Lamiyə Vəliyevanın hekayəsi də diqqət çəkir.
Rauf Məmmədov və Nataliya Buksa
Şahmat üzrə hazırkı Azərbaycan çempionu Rauf Məmmədov isə ukraynalı şahmatçı Natalya Buksa ilə evlidir.
Bu beynəlxalq ailələr ölkənin mədəni müxtəlifliyini zənginləşdirməklə yanaşı, müxtəlif ölkələrin ən yaxşı idman ənənələrini birləşdirərək idmanın inkişafına təkan verir.
İdman.biz
