İdman.biz
"Final zamanı inanılmaz bir hərəkət nümayiş etdirdik. Bütün zal bizi dəstəklədi".
İdman.biz xəbər verir ki, bunu qrup hərəkətləri üzrə Azərbaycan yığmasının gimnastı Ləman Əlimuradova deyib.
Paris-2024 Yay Olimpiya Oyunlarında 5-ci yerə tutan komandanın üzvü hər iki çıxışı səhsviz başa vurduqlarını bildirib: "Böyük adrenalin mühiti var idi. Zal bizə güclü təkan verdi. Çox xoşbəxtik ki, hər iki çıxışımı səhvsiz başa vurduq. Yaxşı əhval-ruhiyyədə idik və bu baxımdan məşqçimiz Siyana Vasileva bizə həmişə böyük dəstək verir".
Zeynəb Hümmetova olimpiadada ən yaxşılar arasında yer aldıqlarını görə qürur hissi keçirdiyini deyib: "Olimpiadada çıxış etmək və ən yaxşılar arasında olmaq bizim üçün böyük şərəfdir. Bu yolda bizə kömək edən hər kəsə - federasiyaya, məşqçilərə, həkimlərə və xoreoqraflara təşəkkür edirik. Yaxşı çıxış edə bildiyimiz üçün qürur duyuruq. Məşqçi bizdən məmnundur, deməli, doğru yoldayıq. Komandaya daha böyük nəticələr qazanmasını arzulayıram. Siyana Vasilyeva yığmada olduğu müddətcə hər şey yaxşı olacaq".
Qeyd edək ki, Zeynəb Hümmətova, Ləman Əlimuradova, Darya Sorokina, Güllü Ağalarzadə və Yelizaveta Luzandan ibarət "beşlik" bu gün başa çatan final mərhələsində 5-ci yeri tutub.
Zəki Feyzullayev
İdman.biz
