İdman.biz
Bakıda Ümummilli Lider Heydər Əliyevin xatirəsinə həsr olunmuş həndbol üzrə beynəlxalq turnirin açılış mərasimi keçirilib.
İdman.biz xəbər verir ki, "AHF Arena"da baş tutan mərasimdə gənclər və idman naziri Fərid Qayıbov, müavini Marina Vasileva, Azərbaycan Həndbol Federasiyasının I vitse-prezidenti Orxan Abbasov iştirak ediblər.
Tədbirdə çıxış edən gənclər və idman naziri Fərid Qayıbov turnir iştirakçılarına uğurlar arzulayıb. Nazir belə turnirlərin təşkilinin bu idman növünün inkişafına təkan verdiyini qeyd edib.
Orxan Abbasov isə yarışla bağlı ümumi məlumat verib.
Daha sonra Ümummilli lider Heydər Əliyevə həsr edilmiş videoçarx nümayiş etdirilib.
Azərbaycan Respublikasının Dövlət Himni səsləndirilib. Açılış mərasimi bədii hissə ilə davam edib.
Qeyd edək ki, Ümummilli Lider Heydər Əliyevin xatirəsinə həsr olunan turnirdə qadınlardan ibarət 6 komanda mübarizə aparır. Azərbaycan Həndbol Federasiyasının təşkil etdiyi yarışda "Azəryol", "Qarabağ" və "Kür"lə yanaşı, "Astana" (Qazaxıstan), "Alatau Arulary" (Qazaxıstan) komandaları və Özbəkistan millisi mükafatlar uğrunda yarışacaq.
Sentyabrın 1-dək "AHF Arena"da keçiriləcək turnir federasiyanın "YouTube" kanalı və rəsmi "Facebook" səhifəsində canlı yayımlanacaq.
Aytac Sahəd
İdman.biz
