İdman.biz
Azərbaycan komandası gimnaziadada çıxışa hazırlaşır. 16 yaşdan 18 yaşa kimi olan məktəblilər arasında olan bu böyük yarışı olimpiadaya da bənzətmək mümkündür. Bəhreyndə idmançılarımız yüksək nəticələrə kökləniblər.
İdman.biz xəbər verir ki, multiforum bir neçə ildən bir təşkil edilir və Beynəlxalq Məktəb İdmanı Federasiyasının təşəbbüsü ilə keçirilir.
Gimnaziadanın tarixi 1974-cü ildə Almaniyanın Visbaden şəhərində başlayıb. Sonra Avropa ölkələri 1990-cı ilə kimi iki ildən bir bu yarışları keçiriblər. Brügge-1990-dan sonra gimnaziadanı daha az - üç-dörd ildə bir dəfə keçirmək qərarına gəliblər. 21-ci əsrdə yarışları təşkil etməkdə qeyri-Avropa ölkələri daha çox fəallıq göstərirlər, məsələn, Qətər, Braziliya, Mərakeş. Keçirdiyi gimnaziadaların sayına görə Fransa aşkar fərqlə liderdir (5 dəfə), elə son multiforumu da 2022-ci ildə təşkil edib - məktəblilər Normandiyada qonaq olublar. Orada 64 ölkədən 3600 gənc idmançı mübarizə aparsa da, Bəhreyndə bu rəqəmlər daha böyük olacaq. Manamada 71 ölkədən 3687 məktəbli çıxış edəcək. Eyni zamanda, Azərbaycan millisi iştirakçıların sayına (160 nəfər) görə beşinci, nümayəndə heyəti tərkibinə (244 nəfər) görə isə dördüncüdür. Yarış təşkilatçıları liderdir (385 idmançı), Braziliya (246), Səudiyyə Ərəbistanı (243) və Hindistan (167) ilk dördlükdə yer alıblar.
Yarış proqramına oxatma, atletika, badminton, 3x3 basketbol, çimərlik voleybolu, boks, şahmat, qılıncoynatma, idman və bədii gimnastika, aerobika, cüdo, taekvondo, tennis, karate, güləş, həndbol, rəqs idmanı, stolüstü tennis, səmti müəyyənetmə, üzgüçülük, padel, həmçinin paralimpiya atletikası, üzgüçülük, cüdo və badminton daxildir.
Manamada iştirakçılar 14 məkanda yarışacaqlar və sabah açılış mərasimi olacaq. Azərbaycan komandası ən yüksək yerləri tuta bilər və ilk növbədə, ənənəvi olaraq güləş, boks, taekvondo, cüdodan medallar gözləmək olar. İdmançılarımız gimnastika növləri, şahmat və digər idman növləri, o cümlədən qılıncoynatmada da fəxri kürsüyə qalxmaq uğrunda mübarizə aparmaq şansına malikdirlər. Cüdo, atletika və üzgüçülükdə ənənələri nəzərə alaraq, paralimpiyaçıları da qeyd etmək yerinə düşər.
Yarış proqramı çox zəngin olacağını vəd edir və 27 oktyabr mədəni tanışlıq günü olacaq. Gimnaziadanın bağlanış mərasimi üç gün sonra - oktyabrın 30-a təyin edilib.
Multiforum məktəblilər üçün əla tədbir olacaq və onlar dünyanın müxtəlif yerlərindən olan həmyaşıdları ilə yarışmaq imkanı əldə edəcəklər.
Gimnaziadanın əsas ideyası tələbələrin fiziki, intellektual, əxlaqi və sosial-mədəni inkişafı, eləcə də müxtəlif ölkələrdən olan məktəblilər arasında beynəlxalq əməkdaşlığın və qarşılıqlı anlaşmanın gücləndirilməsidir.
Zəki Feyzullayev
İdman.biz
