Gələcək üçün dəyişikliklər: Taekvondoda məşqçi təyinatları ayı

Noyabrın əvvəli taekvondo üzrə Azərbaycan millisində bir sıra məşqçi təyinatları ilə yadda qalıb.

İdman.biz xəbər verir ki, qadınlardan ibarət komanda Günay Zeynalova, gənclərdən ibarət qadın komandası Fəridə Əzizovaya həvalə olunub, yeniyetmələr isə Ayxan Tağızadənin rəhbərliyi ilə çıxış edəcəklər.

Böyük idman təcrübəsi olan, yeni nəslə çox şey verə bilən gənc mütəxəssislər məşqçi kimi fəaliyyətə başlayıblar.

Rəsmi təyinatın bu yaxınlarda olmasına baxmayaraq, Əzizova və Tağızadə ən azı bir turnirdə - Bəhreyndə keçirilən Gimnaziadada komandalarına rəhbərlik ediblər. Manamada Elcan Əliyev (78 kq) gümüş, Seyidxanım Məmmədova (52 kq) bürünc medal qazanıb. İndi yeni məşqçilər öz vəzifələrinin icrasına tam başlayıblar və komandanı yeni mövsümə hazırlayacaqlar.

Əzizova və Tağızadənin gənclər komandasına gəlişi gənc istedadlara yeni təkan vermək məqsədi daşıyır. Üstəlik, Fəridə gənclər arasında dünya çempionu olmaqla adından söz etdirib, sonralar böyüklər arasında dünya çempionatında bir neçə dəfə fərqlənib, dəfələrlə olimpiadada çıxış edib. Bir sözlə, o, karyerasını başa vurana kimi xeyli yol keçib.

Ən texnikalı idmançılardan biri kimi yadda qalan Tağızadə Avropa Oyunlarının və İslam Həmrəyliyi Oyunlarının qalibi olub. Təbii ki, onun məşqçilik təcrübəsi Əzizovadan azdır, lakin daha da inkişafı üçün perspektivlər var.

Qadınlardan ibarət milli üçün də yeni səhifə açılır. Uzun müddət komandaya koreyalı Sun-Min Park rəhbərlik edirdisə, indi bu vəzifə Günay Zeynalovaya həvalə olunub. Şübhəsiz, istedadlı taekvondoçularımız var, lakin onların elitada parlamağa başlaması üçün hələ çox zaman var.

Federasiyanın gənc mütəxəssislərə diqqət yetirməsi tamamilə başa düşüləndir. Hazırlıqlar Los-Ancelesə, hətta 2032-ci il Oyunlarına da hədəflənib. Axı sonuncu tsikl az qala fəlakətə çevrildi: Parisə yeganə lisenziya qazanıldı. Qaşım Maqomedov əslində olimpiadanın finalına çıxmaqla taekvondo məktəbimizin nüfuzunu xilas etdi. Millidəki kritik vəziyyəti düzəltməyi bacaran kişilərdən ibarət komandanın baş məşqçisi vəzifəsinə Məmməd Abdullayevin təyin edilməsi də vaxtında idi.

Ona görə də növbəti mövsüm təkcə idmançılar üçün deyil, həm də fərdi olaraq hər bir məşqçi üçün yeni çağırış olacaq.

Zəki Feyzullayev
İdman.biz