Fransada yenidən adından söz etdirməyi bacaran paralimpiyaçımız - TƏHLİL

Azərbaycan millisinin Paralimpiya Oyunlarındakı medal hesabı artmaqda davam edir. Komandaya üçüncü qızıl medalı 100 metr məsafəyə qaçışda dünya rekordu ilə qalib gələn Lamiyə Vəliyeva qazandırıb. O, məsafəni 11,76 nəticə ilə qət edərək, ikiqat paralimpiya çempionu olub.

İdman.biz xəbər verir ki, hələ ilkin mərhələdə idmançımız braziliyalı Rayan Soareşi 0,09 fərqlə qabaqlayaraq məsafəni kifayət qədər inamla qət etmişdi. Bu, Lamiyə üçün mövsüm ərzində ən yüksək nəticə olsa da, finalda onu yaxşılaşdırmaqla yanaşı, həm də yarışı dünya rekordu ilə başa vurdu. İdmançımız braziliyalı rəqibindən 0,02 fərqlə daha sürətli idi ki, bu da qələbə üçün kifayət etdi.

Vəliyeva üçün Paris xoşbəxt şəhərə çevrilir. Lisenziya verən dünya çempionatı məhz burada keçirilmiş və o, əvvəlcə 100 metr məsafəyə, sonra da 400 metr məsafəyə qaçışda qalib gəlmişdi. Nəticədə o, Paris-2024 Paralimpiadasının əsas favoritlərdən biri sayılırdı: Tokioda paralimpiya debütündə qızıl və gümüş medallar qazanan Lamiyə indi idmançı kimi daha da təkmilləşib, ardıcıl olaraq nəticələrini yaxşılaşdırıb və Fransa paytaxtında yenidən adından söz etdirməyi bacardı.

Lamiyə bu uğurunu davam etdirə də bilər: belə ki, Paralimpiada hələ onun üçün davam edir. O, 400 metr məsafəyə qaçışda da yarışacaq və burada Tokiodakı nailiyyətini təkrarlamaq üçün əla şansı var. Ümumilikdə son iki dünya çempionatında hər iki məsafədə məğlubedilməz olan idmançımız, şübhəsiz ki, Parisdə növbəti qızılını əldə etməyə çalışacaq.

Beləliklə, Azərbaycan komandasının hazırkı Paralimpiadada atletika üzrə artıq iki medalı var. Bundan əvvəl üç təkanla tullanmada 7,27 nəticə göstərən Səid Nəcəfzadə ən yaxın rəqibi özbək Domior Saliyevi 11 sm qabaqlaya bilmişdi.

Taekvondo da ümumi hesabımıza iki medal gətirib. İmaməddin Xəlilov (70 kq) parlaq qələbə qazanıb, Sabir Zeynalov (58 kq) isə bürünc mükafata sahib çıxıb.

Üzgüçü Roman Saley də fəxri kürsüyə qalxa bilib. Üçqat paralimpiya çempionu Parisdə 100 metr məsafəyə sərbəst üsulla üzgüçülük yarışında gümüş medal qazanıb.

nun hələ digər üzgüçülük yarışlarında medallar uğrunda mübarizə aparmaq şansı olacaq.

Ümumi hesabda Azərbaycan hazırda 22-ci yerdədir (3 qızıl, 1 gümüş, 1 bürünc).

Zəki Feyzullayev
İdman.biz