Fidan Ağasiyeva: “Yenidən bu yarışda ölkəmizi çox yaxşı şəkildə təmsil edəcəyik”

"Oyunlar gərgin keçsə də, əllərimizdən gələni etdik".

İdman.biz xəbər verir ki, bunu Fövqəladə Hallar Nazirliyinin əməkdaşı Cəlil Cəlilov Moskvada keçirilən "Kooperativ idmanın inkişafı Assosiasiyalarının Moskva yay oyunları"dakı çıxışını dəyərləndirərkən deyib.

O, voleybol üzrə mübarizədə komandasının qızıl medal qazanmasını böyük nailiyyət adlandırıb: "Bütün mərhələləri uğurlar adlayıb, finalda əzimkar mübarizə apardıq. Rəhbərliyimizə söz vermişdik ki, gümüş medalı yox, məhz qızılı gətirəcəyik. 24 komandanın qatıldığı yarışda da bunu bacardıq".

Rəqəmsal İnkişaf və Nəqliyyat Nazirliyinin əməkdaşı Anar Rəsulov isə şahmat yarışında ölkəmizi yüksək səviyyədə təmsil etdikləri üçüm qürur hissi keçirdiyini deyib: "Qızıl medal qazandığımız üçün çox xoşbəxtik. 55 nəfər iştirakçının mübarizə apardığı yarışda qələbə qazanmaq asan olmadı. Maydan bu yarışlara hazırlaşırdıq. Sonda əziyyətimiz yerdə qalmadı".

Azərbaycan Hava Yollarının əməkdaşı Fidan Ağasiyeva da Vətənə sevinclə döndüyünü vurğulayıb: "Gənclər və İdman Nazirliyinə dərin minnətdarlığımı bildirirəm. Yarış yaxşı keçdi. Bütün idman növlərində müəyyən nəticələrimiz var. Ümid edirəm ki, yenidən bu yarışda ölkəmizi çox yaxşı şəkildə təmsil edəcəyik".

Fövqəladə Hallar Nazirliyinin qızıl medal qazanan əməkdaşı Nihad Tanrıverdiyev voleybol yarışlarının gərgin çıxdığını bildirib: "Bütün qarşılaşmaları qələbə ilə bitirdik. Oyunun həlledici hissəsində inamlı oyun sayəsində qalib gəldik. İlk dəfə keçirilən bu yarışda belə nəticə sadəcə unudulmazdır. Gələcəkdə bu nailiyyəti təkrarlamaq və dövlət strukturları arasında keçirilən yarışlarda yaxşı nəticə qazanmaq, eyni zamanda FHN adından peşəkar liqada komanda olaraq fəaliyyətimizə davam etdirmək istəyirik".

Gənclər və İdman Nazirliyinin sektor müdiri Elçin Qasımov isə bildirib ki, "Kooperativ idmanın inkişafı Assosiasiyalarının Moskva yay oyunları"nda dövlət qurumları ölkəmizi uğurla təmsil ediblər: "Yarışı 3 qızıl, 3 gümüş və 2 bürünc medala başa vurduq. Düşünürəm ki, bu Oyunlar dövlət qurumları arasında təşkil etdiyimiz turnirlərin kütləviliyinin artmasına təkan verəcək".

Banuçiçək Hüseynli
İdman.biz