Fərid Qayıbov: “Növbəti Olimpiadada bu tendensiya aradan qalxacaq”

"Avqust ayı Paris-2024 Yay Olimpiya Oyunları ilə yadda qaldı".

İdman.biz xəbər verir ki, bunu gənclər və idman naziri Fərid Qayıbov kamandan oxatma üzrə ölkə birinciliyi və çempionatının açılış mərasimindən sonra jurnalistlərə açıqlamasında deyib.

Nazir Paris-2024 Yay Olimpiya Oyunlarında ölkəmizi təmsil edən kamandan oxatan Yaylagül Ramazanovanın çıxışını dəyərləndirib: "Olimpiadada ilk dəfə 15 idman növündə təmsil olunduq. Çox sevinirik ki, bu idman növlərindən biri də kamandan oxatma idi. Azərbaycan idmançısı Yaylagül Ramazanova bizi layiqincə bu yarışda təmsil etdi. İnanıram ki, bundan sonra çox uşaqlar Yaylagülə baxaraq bu idman növünə üz tutacaqlar".

Onun sözlərinə görə, kamandan oxatma üzrə keçirilən ölkə birinciliyi və çempionatında təşkilatçılıq yüksək səviyyədədir: "İstərdim ki, bu idman növü üzrə beynəlxalq yarışlar keçirilsin. Bu da olacaq. İdmançılarımızın bu idman növü üzrə sayının artması da bizim üçün önəmlidir. Növbəti Olimpiya Oyunlarında çox sayda kamandan oxatanımız bizi təmsil etsinlər. Nazirliyin yaranmasının 30 illiyi ilə bağlı bir çox tədbirlər keçirmişik. Bununla bağlı müxtəlif federasiyalar yarışlar və tədbirlər də təşkil ediblər".

Nazir bildirib ki, ölkəmizdə bütün idman növlərinə dövlət qayğısı göstərilir, inkişafı istiqamətində müəyyən işlər görülür: "Bu gün biz bütün idman növlərində medal qazana bilmərik. Elə idman növləri var ki, hələ inkişaf etdirilməlidir. Bunun üçün də xaricdən məşqçilər və idmançılar dəvət olunur. Bəzi idman növlərimizdə isə sırf yerli idmançılar ölkəmizi təmsil edir. Biz də istəyirik ki, yerli idmançılarımızın sayı artsın və mötəbər yarışlarda Azərbaycanı yüksək səviyyədə təmsil etməyi bacarsınlar. Bunun üçün də federasiyalarda işlər görülür. Məsələn, batut Azərbaycanda 2014-cü ildən inkişaf etdirilməyə başlayıb və daha öncə olmayıb. Amma bu 10 ildə idmançımız yetişib, Olimpiya Oyunlarında bizi təmsil edib. Bunların hamısını genişləndirəcəyik və 2028-ci ildə keçiriləcək Olimpiadada bu tendensiya aradan qalxacaq. Federasiyalarla bərabər çalışırıq. Nəticəni yalnız bu cür əldə etmək olar. Mütəmadi olaraq bizim qurumlarla görüşlərimiz keçirilir və nazirliyin idman strategiyasına uyğun məsələlər müzakirə edilir".

Banuçiçək Hüseynli
İdman.biz