İdman.biz
Azərbaycan millisi Paris-2024 Yay Olimpiya Oyunlarında 5-ci medalı qazanıb.
İdman.biz xəbər verir ki, bu uğura Alfonso Dominqes imza atıb.
92 kq çəkidə çıxış edən boksçumuz finala qədər bütün rəqiblərinə qalib gəlib. Yalnız həlledici görüşdə uduzan idmançımız gümüş mükafata sahib çıxıb. Bu, hesabında 2 qızıl və 1 bürüncü olan millimizin ikinci gümüşüdür.
Alfonsonun medalı Olimpiadalar tarixinə Azərbaycan idmançılarının əldə etdiyi 54-cü mükafat kimi düşüb. Debütü Atlanta-1996-da gerçəkləşən yığmamız 8-ci Oyunlarında bu rəqəmə çatıb. 9 qızıl və 29 bürüncü olan millimiz 16-cı gümüşü əldə edib.
Bu mükafatlardan 10-u boks millimizin hesabındadır: 2 gümüş və 8 bürünc. Tokio-2020-də 81 kq çəkidə bürünc, Paris-2024-də 92 kq çəkidə gümüş qazanan Alfonsodan başqa, 8 dəri əlcək sahibimiz fərqlənib. Lorenso Sotomayor (64 kq) Rio-2016-nın gümüş mükafatına yiyələnib. Vüqar Ələkbərov (75 kq) Sidney-2000, Fuad Aslanov (51 kq) və Ağası Məmmədov (54 kq) Afina-2004, Şahin İmranov (57 kq) Pekin-2008, Teymur Məmmədov (91 kq) və Məhəmmədrəsul Məcidov (+91 kq) London-2012, Kamran Şahsuvarlı (75 kq) Rio-2016 Oyunlarının bürüncünə sahib çıxıb.
Qeyd edək ki, Paris-2024-də bunadək cüdoçular Hidayət Heydərovla (73 kq) Zelim Kotsoyev (100 kq) qızıl, taekvondoçu Qaşım Maqomedov (58 kq) gümüş, yunan-Roma güləşçisi Həsrət Cəfərov (67 kq) bürünc medal qazanıb.
Vüqar Xeyrullayev
İdman.biz
