Idman.biz
Bakıda 8 Noyabr - Zəfər Gününə həsr olunan "Zəfər Kuboku" uğrunda yorğa qaçışlarında Azərbaycanın müxtəlif bölgələrindən 80-ə yaxın iştirakçı mübarizə aparır.
İdman.Biz xəbər verir ki, bu barədə Azərbaycan Atçılıq Federasiyasının at yarışları üzrə departamentinin rəhbəri Elnarə Musayeva jurnaslitlərə açıqlamasında bildirib..
Federasiya rəsmisinin sözlərinə görə, Binə Atçılıq Mərkəzində təşkil olunan yarışda 14 kateqoriya üzrə qaliblər müəyyənləşdirilir.
"Zəfər Gününə həsr olunan möhtəşəm tədbirdə Azərbaycanın müxtəlif bölgələrindən 80-ə yaxın yorğa həvəskarı toplaşıb. Yarışlar 14 kateqoriya üzrə keçirilir. Yorğa atlarının yarışları xüsusi qaydalarla təşkil olunur. Atlar startdan finişə qədər bütün məsafəni yorğa yerişi ilə qət etməlidirlər. Onların adi atlar kimi dördnala keçməsinə icazə verilmir. Bu qaydanı pozan atlara əvvəlcə xəbərdarlıq edilir, daha sonra isə yarışdan kənarlaşdırılırlar", - deyə Musayeva söyləyib.
E.Musayeva yarışa ölkənin müxtəlif bölgələrindən böyük maraq göstərildiyini vurğulayıb:
"Gördüyümüz kimi, burada gərgin və maraqlı mübarizə gedir. Şuşadan, Bakının demək olar ki, bütün kəndlərindən və ölkənin digər bölgələrindən iştirakçılar gəliblər. Bu, çox sevindirici haldır. İnanırıq ki, gələcəkdə yorğa atlarının yarışları daha da inkişaf edəcək. Federasiya olaraq bu istiqamətdə əlimizdən gələn dəstəyi göstəririk. Bütün iştirakçılara uğurlar arzulayıram. Qoy ən güclüsü qalib olsun!"
Qeyd edək ki, "Zəfər Kuboku" uğrunda yarışlarda atlar 1200 metrdən 3200 metrədək müxtəlif məsafələrdə qüvvələrini sınayırlar. Qaliblər kubok, medal və diplomlarla mükafatlandırılacaqlar.
