Bədii gimnastımız: “Top-5”də yer almaq bizim üçün fəxrdir"

"Biz güclü komandayıq".

İdman.biz xəbər verir ki, bunu Paris-2024 Yay Olimpiya Oyunlarında 5-ci yeri tutan qrup hərəkətləri üzrə Azərbaycan millisinin bədii gimnastı Güllü Ağalarzadə Heydər Əliyev Beynəlxalq Aeroportunda qarşılama mərasimində jurnalistlərə açıqlamasında deyib.

Yarışda debüt edən idmançı bildirib ki, sonadək mübarizə aparıblar: "Top-5"də yer almaq bizim üçün fəxrdir. Bu nəticədə bütün Azərbaycan xalqının əməyi var. Azərbaycan Gimnastika Federasiyasının prezidenti Mehriban xanım Əliyevanın paylaşımı bizi çox xoşbəxt etdi. Çox şanslıyıq ki, o bizi daim dəstəkləyir və bu bizim üçün çox dəyərlidir. Sevinirik ki, Olimpiadada ölkəmizi layiqincə təmsil etdik".

Onun sözlərinə görə, komanda yoldaşları ilə artıq bir-birilərini göz qırpımında belə anlaya bilirlər: "Daim bir-birimizi hiss edirik. Önəmli olan məqam da budur. Bütün bu amillər bizə kompazisiya anında kömək oldu. Olimpiada böyük sürprizlərlə dolu yarışdır. Burada bizi təəccübləndirən məqam liderlərin zəif çıxış etməsi oldu".

Komandanın digər bədii gimnastı Zeynəb Hümmətova isə hər şey üçün zamana ehtiyacın olduğunu vurğulayıb: "Qazandığımız nəticə ilə artıq gücümüzü dünyaya göstərdik. Bu komanda davam etsə, məşqlərdə daha da səylə çalışsaq, növbəti Olimpiadada Azərbaycana tarixi medal gətirə bilərik. Əsas məqsədimiz öz kompazisiyalarımızı yerinə yetirməkdir. Sevirik ki, finalda istədiyimiz kimi çıxış etdik. Növbəti Olimpiaadaya az müddət qalmayıb. Bu illər ərzində nəyin necə olacağını zaman göstərəcək".

Qeyd edək ki, bədii gimnastika üzrə komandamız Parisdə ən yaxşı göstəricisini müəyyənləşdirib.

Banuçiçək Hüseynli
İdman.biz