Report.az
Mayda Bakıda keçiriləcək dünya çempionatının seçmə mərhələsində iştirak edəcək Azərbaycanın 3x3 basketbol millilərinin heyətləri hələ formalaşmayıb.
Bu barədə "Report"a Basketbol Federasiyasının baş katibi Vüqar Əzimov bildirib.
Qurum rəsmisi yığmanın hazırlıq planı ilə bağlı sualı da cavablandırıb:
"Həm qadın, həm də kişilərdən ibarət 3x3 basketbol millimiz də yarışa qatılacaq. Amma heyətlər aprelin 15-dən sonra müəyyənləşəcək. Hazırda bununla bağlı işlər aparılır. 17-18 yaşlı qızlar var, onları yığmaya cəlb etməyə çalışırıq. Bununla bağlı yekun qərar aprelin sonunda veriləcək. Əsas yığmada boş qalan iki mövqeyə hələ ki, baxılır".
Qeyd edək ki, dünya çempionatı mayın 24 və 25-də Bakıda təşkil olunacaq. Yarışda kişilərdən ibarət millimizlə yanaşı, Monteneqro, Kanada, Böyük Britaniya, Ruanda və İran yığmaları mübarizə aparacaq. Qadınların yarışına isə Azərbaycan, Çili, Latviya, Çin Taypeyi, Braziliya və Misir kollektivləri qatılacaq.
Kişi və qadın kateqoriyalarında seçmə mərhələnin ən yaxşı 3 milli komandası Dünya Kubokunun əsas mərhələsində iştirak etmək hüququ qazanacaq.
