Ayxan Tağızadə: "Bu yol sadəcə bir vəzifə deyil, bir arzuya çevrilib"

"Mənə dəstək olan, mənə inanan hər kəsə, xüsusilə Azərbaycan Taekvondo Federasiyasına və qayğısını biz idmançılardan əsirgəməyən cənab Prezidentimizə dərin minnətdarlığımı bildirmək istəyirəm".

İdman.biz xəbər verir ki, bunu taekvondo üzrə gənclərdən ibarət milli komandanın baş məşqçisi Ayxan Tağızadə deyib.

O, idmançı kimi ölkəmizin bayrağını zirvələrdə dalğalandırmaq üçün ürəyini ortaya qoyduğunu, indi məşqçi kimi təcrübəsini gənclərlə bölüşmək istədiyini bildirib: "Ölkəmi təmsil etmək, qızıl medallar və titullar qazanmaq mənim üçün sözlə ifadə edilə bilməyəcək qədər böyük bir şərəf idi. Bu yolda yaşadığım hər an, hər zəfər mənə sadəcə şəxsi bir uğur deyil, Vətənim üçün qazanılan bir nailiyyət kimi gəldi. Azərbaycan bayrağını zirvələrdə dalğalandırmaq, xalqımıza qürur yaşatmaq üçün hər yarışda ürəyimi ortaya qoydum.

İndi isə, illərimi verdiyim idman karyeramı arxada qoyaraq yeni bir yola - məşqçiliyə addım atıram. Bu yol mənim üçün yeni bir missiyadır. Ümid edirəm ki, qazandığım təcrübələri gələcək nəsillərə ötürə biləcəyəm. Onların gözündə parlayan inam və əzmi görmək, onların hər bir qələbəsində öz keçmişimi xatırlamaq, mənə böyük bir sevinc gətirir. Bu yolda gənc idmançılarımıza dəstək olmaq, onlara yol göstərmək, onları uğura ruhlandırmaq mənim üçün sadəcə bir vəzifə deyil, bir arzuya çevrilib".

Gənc mütəxəssis Azərbaycanın beynəlxalq arenada layuquncə təmsil edəcəyinə inandığını vurğulayıb: "Yeni nəsil idmançılarımızın hər biri mənim üçün bir ümid işığıdır. Hər birinin ölkəmizi beynəlxalq arenada layiqincə təmsil edəcəyinə və Azərbaycanın adını ucaldacağına ürəkdən inanıram. Bu yolda mənə dəstək olan hər kəsə, hər bir uğurumda mənə inananlara sonsuz təşəkkürlərimi bildirirəm. Birlikdə yaşadığımız qürur dolu anları ürəyimdə daşıyacağam və bu irsi davam etdirmək üçün çalışacağam. Azərbaycanın adı hər zaman zirvələrdə olsun!".

Qeyd edək ki, Ayxan Tağızadə Bakı-2015 I Avropa Oyunlarında qızıl medalını qazanıb.

İdman.biz