Report.az
Slovakiyaya qızıl medal üçün getmişdim.
Bunu "Report"a açıqlamasında Slovakiyanın paytaxtı Bratislavada keçirilən Avropa çempionatında bürünc medal qazanan Azərbaycan sərbəst güləşçisi Ağanəzər Novruzov deyib.
74 kq çəki dərəcəsində fəxri kürsüyə yüksələn pəhləvan görüşlərinin çətin keçdiyini bildirib:
"Yarışı mükafatsız başa vurmadığım üçün sevincliyəm. Baxmayaraq ki, Slovakiyaya qızıl medal üçün getmişdim. Təəssüf ki, alınmadı. Lakin bürünc medal qazanmaq da pis nəticə sayılmamalıdır. Görüşlərim həqiqətən çətin keçdi. Özümün də fərdi səhvlərim oldu. Bunların üzərində çox çalışmalıyam. İstəyirəm ki, qarşıdakı yarışlarda medalımın əyarını qızıla dəyişim".
Qeyd edək ki, Ağanəzər Novruzov üçüncü yer uğrunda görüşdə Ramazan Ramazanovu (Bolqarıstan) məğlub edərək bürünc medala sahib çıxıb. Ümumilikdə yarışı 1 qızıl, 1 gümüş və 4 bürünc medalla başa vuran yığma 119 xalla komanda hesabında birinci yeri tutub.
