İdman.biz
"Hər zəhmətin arxasında belə uğur görmək qürurvericidir".
Bunu İdman.biz-ə Zambiyanın paytaxtı Lusakada beynəlxalq turnirdə 2 qızıl medal qazanan Azərbaycan millisinin badmintonçu Aqil Qəbilov deyib.
O, cütlərin və qarışıq cütlərin yarışında fəxri kürsünün ən yüksək pilləsinə qalxıb. Qəbilov şəxsi mübarizədə medal qazana bilməməsinin səbəbini açıqlayıb: "Bu, gərgin rəqabət və bəzi taktiki səhvlərə görə alınmadı. 1/4 finaldakı hindistanlı rəqibim təcrübəli idi. 3 set davam edən ağır oyunda 1:2 hesabı ilə məğlub oldum".
Badmintonçu Zambiyada onu təəccübləndirən məqamlardan da danışıb: "Tamaşaçıların marağı və dəstəyi çox yüksək idi. Bu bizi daha da həvəsləndirdi. İqlim və şəraitə uyğunlaşmaq çətin idi. Zambiyada insanların badminton sevgisi və enerjisi məni təəccübləndirdi".
Qeyd edək ki, yarışda millimiz 3 qızıl, 2 gümüş və 2 bürünc medal qazanıb.
Emin Ağa
İdman.biz
