Idman.biz
Azərbaycanın və "Qəbələ"nin MMA döyüşçüsü Tofiq Musayev klubun mətbuat xidmətinə müsahibə verib.
İdman.biz xəbər verir ki, UFC-də debüt edəcək idmançı iyunun 21-də Bakıda keçiriləcək UFC gecəsində baş tutacaq qırğızıstanlı Mıqtıbek Orolbayla döyüşü, hazırlıq və hədəfi barəsində fikirlərini açıqlayıb.
- Bakıda keçiriləcək UFC döyüş gecəsinə hazırlıq necə keçir?
- Döyüşə Tailandda hazırlaşıram. Hazırlıq prosesi qaydasında gedir. Bütün məşqlər plana uyğun, istədiyimiz şəkildə keçir.
- UFC-də ilk rəqibiniz qırğızıstanlı Mıqtıbek Orolbay olacaq. Bu döyüşdən nə gözləyirsiz?
- UFC-də asan rəqib olmur. Burada dünyanın ən güclü döyüşçüləri iştirak edir. Özümə inanıram. Döyüşə qalib gəlmək üçün çıxacam. Qələbə bizimlə olacaq.
- Bu qarşılaşma Bakıda baş tutacaq. Döyüşün ölkəmizdə keçirilməsini necə qarşılayırsız?
- Təbii ki, UFC-nin Bakıda keçirilməsi məni sevindirim. Özüm də vətəndə doğma azarkeşlər önündə döyüşəcəm. Buna görə çox şadam. Onların dəstəyi altında döyüşmək imkanı qazanacam. Bu, böyük stimuldur.
- Dünyanın ən nüfuzlu döyüş təşkilatında debüt edəcəksiz...
- İlk dəfə UFC-də iştirak edəcəm. Dörd döyüşlük müqavilə imzalamışam. Bu, mənim üçün böyük uğurdur. MDB və ABŞ-ın bir çox təşkilatlarında döyüşmüşəm. Hər bir döyüşçü kimi mənim də arzum UFC-yə qatılmaq olub.
- Özünüzü bu arzuya çatmış sayırsız?
- UFC yarımçıq qalan arzularımdan biri idi. Sevinirəm ki, bu təşkilatla da müqavilə imzaladım. Arzuma tam çatmaq üçün qalib gəlməli və Azərbaycanı layiqincə təmsil etməliyəm.
- Bu döyüşdən sonrakı planlara aydınlıq gəlib?
- Bu barədə danışmaq tezdir. Tamamilə Bakıdakı döyüşə kökləmişik. Qarşıdakı planlar barədə bu turnirdən sonra düşünəcəyik.
İdman.biz
