Idman.biz
"Döyüşə hazırlığım kifayət qədər yaxşı olub".
Bunu İdman.biz-ə Azərbaycan kikboksçusu Surət Qarayev deyib.
O, "Sensi-26" liqasında çıxacağı növbəti döyüşündən danışıb. Qarayev bildirib ki, rəqib haqqında kifayət qədər məlumatlıdır: "Hər şey yaxşıdır, formadayam, zədə yoxdur. Hazırlıqlar milli komandanın heyətində baş tutub. Şəxsi məşqçimlə də fərdi və taktiki baxımdan hazırlıq keçmişik".
90 kq-da vuruşacaq kikboksçu rəqibi yaxşı analiz etdiyini də vurğulayıb: "Əvvəllər qarşılaşmasaq da, rəqibi tanıyıram. WAKO versiyası üzrə dünya çempionu, Fil Dişi Sahilindan olan Oli Yves Rolandla vuruşacam. Onun 33 qələbə, 12-i məğlubiyyəti var. Roland güclüdür, ancaq mənim üçün təhlükəli rəqib deyil. Aramızda bir qədər çəki fərqi də var, üstəlik, mən son dövrlərdə çəkimi artırmışam. Buna baxmayaraq, rəqibdən yüngüləm. Ümid edirəm ki, bunun sayəsində daha sürətli olaram. Rəqibin üstünlüyü ucaboy olması və ayaqlarda yaxşı işləməsidir. Boksçu olduğum üçün əllərdə üstün olacağımı düşünürəm. Ümid edirəm ki, qalib tərəf mən olacam".
Qeyd edək ki, qarşılaşma sabah Bolqarıstanın Plovdiv şəhərində baş tutacaq.
Aytac Sahəd
İdman.biz
