Idman.biz
Oktyabrın 17-də Parisdə, noyabrın 27–30-da Qahirədə təşkil olunacaq dünya çempionatına vəsiqə qazandıran karate üzrə lisenziya turniri start götürəcək.
İdman.biz Fransanın paytaxtında olan karate üzrə Azərbaycan millisinin baş məşqçisi Şahin Atamovla əlaqə saxlayaraq, orada artıq tam sürətlə məşqlərə başlayan idmançılarımızın şansları barədə məlumat əldə edib.
"Artıq bildiyiniz kimi, dünya çempionatına lisenziya əldə edəcək karateçilər öz çəki dərəcələrində ilk altı yerin sahibləri olacaqlar. Bizim hələlik yalnız bir lisenziyamız var – bu, üçqat dünya çempionu İrina Zaretskayadır. Elə buna görə də o, bu turnirdə iştirak etməyəcək", – deyə Şahin Atamov bildirib.
Şahin Atamov vurğulayıb ki, MDB ölkələrinin Oyunlarındakı uğurlu çıxışa baxmayaraq, karateçilərimizdən, o cümlədən komandanın kapitanı Asiman Qurbanlıdan tam razı qalmayıb.
"Döyüşlərin səviyyəsinə görə onlardan daha çoxunu gözləyirdim. Ümid edirəm ki, Parisdə gözləntilərimiz doğrulacaq. Xüsusilə, ən təcrübəli komanda üzvü və kapitan kimi Asimandan uğurlu çıxış gözləyirəm. Düşünürəm ki, kişilər arasında bütün beş çəki dərəcəsində idmançılarımız lisenziya qazanacaqlar. Qızlara gəldikdə isə, onlardan da xoş sürprizlər gözləyirəm. Ümid edirəm ki, Qahirədə yalnız Zaretskaya deyil, digər karateçilərimiz də olacaq".
Vüqar Vüqarlı
