Idman.biz
Beynəlxalq Boks Assosiasiyasının (IBA) xətti ilə keçirilən, lakin Beynəlxalq Olimpiya Komitəsi (BOK) tərəfindən tanınmayan boks üzrə dünya çempionatı ətrafında müzakirələr səngimir. Qeyd edək ki, Beynəlxalq Boks Assosiasiyasının təşkil etdiyi turnirə azərbaycanlı boksçular da qatılmışdılar.
Bəs bu turnirdə idmançılarımızın nəticələrindən razı qalmaq olarmı?
İdman.Biz bu və digər suallarla Azərbaycanın əməkdar məşqçisi, boks üzrə milli komandanın baş məşqçisi Nəriman Abdullayevə müraciət edib.
- Əlbəttə, razı qalmaq olar. Necə razı qalmayaq ki, boksçularımız üç medal qazanıblar və onlardan biri qızıldır? Təbii ki, medalların sayı, məsələn, dörd olsaydı, daha da məmnun qalardım. Amma Dubayda keçirilən və son dərəcə sərt rəqabətin hökm sürdüyü bu çempionatda üç medal da kifayət qədər yaxşı nəticədir.
- Amma yaxın keçmişin tanınmış boksçusu Şahin İmranov super ağır çəkidə bürünc medal qazanan Məhəmməd Abdullayevin çıxışı ilə bağlı sərt fikir səsləndirib. İmranov bildirib ki, son dövrlər Abdullayev, yumşaq desək, inkişaf etmir və artıq üç il əvvəlki səviyyəsində deyil.
- Mən İmranovla razıyam. Məhəmməd həqiqətən əvvəlki Məhəmməd deyil, sanki yerində sayır. Amma ədalət naminə qeyd etməliyəm ki, onun yarımfinaldakı rəqibi - rusiyalı David Surov çox güclü idi. Hətta Məhəmməd indiki vəziyyətindən daha yaxşı formada olsaydı belə, onu məğlub edə biləcəyinə əmin deyiləm. Təsadüfi deyil ki, həmin rusiyalı boksçu dünya çempionu oldu.
- Bəs digər bürünc medalçımız Alfonso Dominqes barədə nə deyə bilərsiniz?
- Alfonso texnika və taktika hesabına sakit şəkildə yarımfinala qədər irəlilədi, amma az-çox ciddi rəqiblə qarşılaşan kimi uduzdu. Yeri gəlmişkən, onu məğlub edən özbək boksçu Turabek Həbibullayev finalda məğlub oldu.
- Və təbii ki, Sübhan Məmmədovla bağlı sual verməmək olmaz. O, tariximizdə cəmi dördüncü yerli dünya çempionumuz oldu. Təəssüf ki, ondan əvvəl dünya çempionu olan Ağası Məmmədov, Cavid Çələbiev və Elvin Məmişzadə necə tez parladılarsa, elə də tez sönüblər. Ağasının yolunu dəhşətli avtomobil qəzası kəsdi, digər ikisi isə sürətli enişə görə yalnız özlərini günahlandıra bilərlər. Sizcə, Sübhan dünya boksunun ən yüngül çəki dərəcəsində liderlər sırasına uzun müddətlik daxil ola biləcəkmi?
- Düşünürəm ki, bəli. Əminəm ki, onun uğurunu təkrarlamaq üçün bütün imkanları var. Təkrar demişkən, təəssüf ki, o, BOK tərəfindən tanınan WB versiyası üzrə Liverpulda keçirilən rəsmi dünya çempionatında məğlub oldu. Əks halda, bir il ərzində ikiqat dünya çempionu ola bilərdi və onun "legitimliyi" ilə bağlı bütün suallar aradan qalxardı. Sadəcə, Liverpulda erkən mərhələdə çox güclü türk boksçu ilə üzləşdi və bəxti gətirmədi. Buna baxmayaraq, mən hesab edirəm ki, Sübhan liderlər sırasına ciddi və uzunmüddətli şəkildə daxil olub.
- Sonda boksda hazırda mövcud olan faktiki ikihakimiyyətlilik barədə nə düşündüyünüzü soruşmaq istəyirəm. WB və IBO adlı iki beynəlxalq boks federasiyasının yaxın zamanda birləşəcəyinə inanırsınızmı?
- Açığı, inanmıram. Amma şəxsən mən, təbii ki, olimpiya boksunu dəstəkləyirəm. Təkcə mən yox, federasiyamızın hamısı. Çünki hamımız başa düşürük ki, ən yüksək səviyyədə təşkil olunan, ən nüfuzlu turnir belə Olimpiya Oyunlarını əvəz edə bilməz. Olimpiya Oyunlarında iştirak hər bir azərbaycanlı, eləcə də dünyanın istənilən ölkəsindən olan boksçunun arzusudur.
Vüqar Vüqarlı
