İdman.biz
"Məsuliyyət hər zaman olmalıdır. Rahat olsam, qələbə gəlməyəcək".
Bunu "İdman Bizdə" verlişinin qonağı olan Azərbaycan millisinin boksçusu Malik Həsənov deyib.
63,5 kq-da Paris-2024 Yay Olimpiya Oyunlarına lisenziya qazanan 26 yaşlı idmançı 4 illiyin zirvə yarışında hədəflərini açıqlayıb: "Şəxsi məşqçim, atam İqrar Həsənovun etimadlarını doğrultdum. O və millinin baş məşqçisi Pedro Roke məni motivasiya edirlər. Məni inandırmağa çalışırlar ki, ən güclüyəm. Bunu bilirəm. Öz çəkimin favoritiyəm. Yarışın ciddiliyini bilirəm. Bu mənim ilk Olimpiya Oyunlarım olacaq. Nə qədər məsuliyyət olsa belə, bir o qədər rahatam. Çünki hazırlığıma güvənir, özümə inanıram. Tarix yazacağıq. Bütün bokssevənləri, Azərbaycan xalqını sevindirəcəyik. Niyə də Olimpiya qızılı olmasın? Artıq tarix yazmağın vaxtıdır".
Həsənov atasının ona dəstəyini xüsusi vurğulayıb: "Atam lisenziya qazandığıma görə çox sevinirdi. Telefonla tez-tez danışırdıq. O, bütün rəqiblərimi tanıyırdı. Hansı üslubda döyüşməli olduğumu mənə deyirdi. Bu da özünü yaxşı tərəfdən göstərdi. Güclü rəqiblərim üzərində asan qələbələr qazandım".
Qeyd edək ki, Həsənov Tailandın paytaxtı Banqkokda keçirilən II Dünya Olimpiya Təsnifat Turnirində Paris-2024-ə vəsiqə qazanıb.
Emin Ağa
İdman.biz
