Idman.biz
Bu gün MDB Oyunlarında qadın boksçuların yarışına yekun vurulub.
İdman.biz-in məlumatına görə, baş məşqçi İlkin Ağayevin rəhbərlik etdiyi qadın boksçularımız bir qızıl, beş gümüş və dörd bürünc olmaqla 10 medal qazanıblar. Mükafatlandırma mərasimindən dərhal sonra, necə deyərlər, "isti-isti" emosiyalarını bölüşən baş məşqçidən müsahibə aldıq.
- Komandanın çıxışından razısınız?
- 11 idmançımızdan 10-u medal qazanıbsa, mən necə razı olmaya bilərəm! Və həmin 11 nəfərdən altısı finala yüksəlib! Demək, komandanın çıxışını uğurlu adlandırmaq olar.
- Komanda 10 medal qazandı. Baş məşqçi 10 ballıq şakalayla onların çıxışını necə qiymətləndirərdi?
- Məncə, səkkiz ballıq. Bəli, dörd medal qazanmağı planlaşdırırdıq (1-1-2), amma 2,5 dəfə çox qazandıq. Amma necə deyərlər, iştaha yeməklə gəlir (gülür).
- Qızlardan hansı ümidlərinizi doğrultdu, hansı isə əksinə, öz qabiliyyətlərindən aşağı çıxış etdi?
- Deməzdim ki, ümidləri doğrultmadılar – sadəcə, bəxtləri gətirmədi. Aysel Fərəcova çempion olmaq şansını əldən verdi. Özbəkistandan olan rəqibinə qarşı demək olar ki, bərabər döyüşdü, amma təəssüf ki, məğlub oldu. Əks halda iki qızıl medalımız olacaqdı! Ancaq yenə də ona afərin! Medalsız yeganə idmançımız Sima İsmayılova 1/4 finalda çox yaxşı mübarizə aparsa da, təəssüf ki, rəqibinə uduzdu. Və təbii ki, çempionumuz Gülər Hüseynova hər cür təriflərdən yüksək çıxış etdi...
- Qızlar yarışı oğlanların yarışından daha çox tamaşaçı cəlb edirdi. Bu o deməkdirmi ki, indi belə uğurdan sonra mentalitetimiz qadın döyüş sənətinin, o cümlədən boksun inkişafına daha az mane olacaq və valideynlər qızlarını boks idman zallarına gətirməyə daha həvəsli olacaqlar?
- Tamamilə haqlısınız – bizim döyüşlərimiz kişilərdən daha çox tamaşaçı cəlb etdi! Son illər ölkəmizdə qadın boksu fəal şəkildə inkişaf edir və bu turnir buna əyani sübutdur. Nəzərə alsaq ki, yarış paytaxtda deyil, rayonlarımızdan birində - Yevlaxda keçirilib, bu maraq az əhəmiyyət kəsb etmir. Ümid edirəm ki, bu cür uğurdan sonra mentalitetimiz qadın boksumuzun inkişafına mane olmayacaq və boks zallarında daha çox qadın görəcəyik.
Yevlaxdan Vüqar Vüqarlı
