Idman.biz
Yüngül çəkidə UFC çempionu İliya Topuriyanın keçmiş həyat yoldaşı Corcina Badell sosial mediada təhdid və təqiblərlə bağlı İspaniya Milli Polisinə rəsmi şikayət ərizəsi verib.
İdman.Biz "Hola" nəşrinə istinadla xəbər verir ki, bu, onun vəkili boşanmasının təfərrüatları barədə ictimaiyyətə açıqlama verməyəcəyini bildirdikdən sonra baş verib.
Topuriya əvvəllər sosial mediada ona qarşı ciddi təzyiqlərin, o cümlədən pul qoparmaq üçün məişət zorakılığı ilə bağlı yalan ittihamlar yaymaqla hədələmələrin olduğunu bildirmişdi. Çempion keçmiş həyat yoldaşının onunla bağlı yaydığı şayiələri qəti şəkildə təkzib edib və günahsızlığını sübut edən video yazılarının olduğunu iddia edib.
"El Mundo"nun məlumatına görə, boşanma prosesi bir neçə aydır davam edir. Cütlüyün nikahdan əvvəl razılaşması var, lakin onlar maliyyə şərtləri barədə razılığa gələ bilmirlər. Badell və qızları müvəqqəti olaraq ailə evində yaşayırlar. Xatırladaq ki, bu şəxsi ailə münaqişəsi səbəbindən İliya Topuriya karyerasına 2026-cı ilin birinci rübünə qədər fasilə vermişdi. Onun yoxluğunda UFC 24 yanvar 2026-cı il tarixinə Castin Qetji və Paddi Pimblet arasında müvəqqəti yüngül çəki üzrə titul döyüşü təyin etmişdi.
