Sport24.az
Serbiyanın Zlatibor şəhərində məktəbli boksçular arasında keçirilən Avropa çempionatında hakim qərəzi ilə üzləşən Azərbaycan boksçusu Yusif Ağakişiyev (75 kq) haqq-ədalətin yerini tapacağına inanır. Sport24.az xəbər verir ki, bu barədə "Report"a açıqlamasında boksçu özü bildirib.
O, finalda serbiyalı boksçudan tam üstün olduğu halda hakim tərəfindən xalının kəsildiyini deyib: "Finalda yerli boksçu Viktor Maystroviçlə döyüşürdüm. Tam udduğum və düzgün zərbələr vurduğum halda, hakim xalımı kəsdi. Xəbərdarlıq etdi ki, əlin içi ilə vururam. Amma videolarda da göründüyü kimi, elə deyildi. Rəqib ilk raundda mənə bir zərbə belə vurmamışdı. Amma nəyəsə görə qərəzli qərar çıxarıldı və xalı serbiyalı rəqibimə verdilər. Ona görə də məşqçim dözmədi, səbri tükəndi və rinqə girdi. Beynəlxalq Boks Assosasiyasının (IBA) prezidenti Umar Kremlyov açıqlamasında hakimin boksdan ömürlük uzaqlaşdırılacağını deyib. Bizim federasiya da IBA-ya məktub yolladı. Baxdılar və döyüşü mənim udduğumu gördülər. İnanıram ki, haqq-ədalət öz yerini tapar və qələbəni mənə qaytararlar. Çünki rəqibimdən tam üstün idim".
Qeyd edək ki, Avropa birinciliyinin final görüşündə serbiyalı Viktor Maystroviçlə üz-üzə gələn Y.Ağakişiyevin çempionluğu əlindən alınıb. Döyüşün Şimali Makedoniyadan olan baş hakimi Stefan Subalevski qərəzli şəkildə rəqibin xeyrinə qərarlar verib və yarımçıq dayandırılan görüşdə serbiyalı idmançı qalib elan olunub.
Baş verənlərlə bağlı Azərbaycan Boks Federasiyası tərəfindən Beynəlxalq Boks Assosiasiyasına ünvanlanan etiraz məktubundan sonra qurumun prezidenti Umar Kremlyov şəxsi sosial şəbəkə hesabında Stefan Subalevskinin hakimlikdən ömürlük uzaqlaşdırılacağını açıqlayıb.
