Idman.biz
"İslam Həmrəyliyi Oyunlarına tam hazırıq. Məqsədimiz Vətənə medallarla qayıtmaqdır".
İdman.Biz bildirir ki, bu sözləri kişi boksçulardan ibarət Azərbaycan millisinin məşqçisi Nəriman Abdullayev Səudiyyə Ərəbistanının Ər-Riyad şəhərində keçirilən VI İslam Həmrəyliyi Oyunlarında mübarizə aparacaq boksçuların şansları barədə danışarkən deyib.
O AZƏRTAC-a açıqlamasında bildirib ki, komanda yarışa hərtərəfli hazırlaşıb: "Yarışa yüksək səviyyədə hazırlıq keçmişik. Fiziki və taktiki baxımdan boksçularımız yaxşı formadadırlar. Son olaraq Özbəkistanda 11-12 ölkənin iştirakı ilə təşkil olunan beynəlxalq təlim-məşq toplanışında iştirak etdik. Həmin toplanışda idmançılarımızın hazırlıq səviyyəsini, fiziki durumlarını sınaqdan keçirdik. Görünən odur ki, hamı motivasiyalıdır və yarışa tam hazırdır".
Mütəxəssis boksçuların yüksək nəticələr əldə edəcəklərinə inandığını deyib: "Sərxan Əliyev (70 kiloqram) və Səidcəmşid Cəfərov (80 kiloqram) təcrübəli boksçularımızdandır. Hər ikisi beynəlxalq arenada bir çox uğurlu çıxışlarla yadda qalıblar. Məhəmmədəli Qasımzadə (60 kiloqram) isə gənc istedadımızdır. Artıq bir ildir böyüklərdən ibarət yığmada çıxış edir. Onun potensialını müxtəlif beynəlxalq turnirlərdə yoxlamışıq və özünü yaxşı tərəfdən göstərməyi bacarıb".
Məşqçi yarışdan gözləntilərini açıqlayıb: "Ər-Riyadda hədəfimiz medallar uğrunda mübarizə aparmaqdır. İdmançılarımızın motivasiyası yüksəkdir. Komandamızın heyəti geniş olmasa da, hər bir boksçumuz maksimum nəticə üçün çalışacaq. Məqsədimiz Vətənə medallarla qayıtmaqdır".
Qeyd edək ki, İslamiadada boks yarışları rəsmi açılış mərasimindən öncə başlayacaq. Bu gün start götürəcək döyüşlər 5 gün sonra yekunlaşacaq.
