BOK&İBA: Çəkişmələrin yeni mərhələsi

Paris-2024 Yay Olimpiya Oyunları ərəfəsində dünya idmanında növbəti qalmaqal yaşanır.

İdman.biz xəbər verir ki, Beynəlxalq Boks Assosiasiyası (İBA) və Beynəlxalq Olimpiya Komitəsi (BOK) arasında uzun müddətdir davam edən çəkişmələr yeni mərhələyə qədəm qoyub.

Buna İBA-nın Paris-2024-lə bağlı qərarı səbəb olub. Qurum Fransa paytaxtında medal qazanan idmançılara mükafat fondu ayırıb. Bu, idmançılara, məşqçilərə, milli assosiasiyalara dəstək, həm də boksçuların əməyinin qarşılığını alması məqsədi daşıyır. İBA BOK-un atletlərə maliyyə dəstəyi göstərə bilməməsi fonunda bu addımı zəruri sayıb.

BOK buna dərhal reaksiya verib. Tomas Baxın rəhbəri olduğu qurum mükafatların ləğv edilməməsi təqdirində İBA üzvlərinin Los-Anceles-2028-ə buraxmamaqla hədələyib. Qurum bunu mükafatların verildiyi maliyyənin mənbəyinin göstərilməməsi, şəffaflığın olmaması ilə izah edib.

Umar Kremlyovun rəhbəri olduğu İBA çoxdan Olimpiya Hərəkatının üzvü deyil. Qurumun Paris-2024-lə bağlılığı da qalmayıb. Təsnifat turnirləri BOK-un xüsusi komitəsi tərəfindən təşkil olunur.

Olimpiya Hərəkatının peşəkarlaşmasının əleyhinə olan BOK belə halla ilk dəfə rastlaşmır. Bir neçə ay əvvəl Dünya Atletikası da analoji addım atıb. Paris-2024-ün atletika yarışlarının çempionlarına maliyyə mükafatları veriləcək.

Həmin vaxt da BOK etiraz səsini ucaltsa da, Dünya Atletikası ilə "kəllə-kəlləyə" gəlməmək üçün ultimatum tərzinə keçməmişdi. Amma İBA ilə uzun müddətdir davam edən çəkişmələr, həmçinin boksun da atletikaya qoşulması Baxı qəzəbləndirib.

BOK bəyanatında boksun Los-Anceles-2028-də olması üçün İBA-ya alternativ qurumun yaradılmasının zəruriliyini vurğulayıb. Düzdür, Ümumdünya Boks Təşkilatı adlı yeni qurum yaradılıb. Lakin İBA ilə ayaqlaşa bilməyən bu təşkilatın taleyi hələ qeyri-müəyyəndir. Bəyanatda bildirilir ki, yeni tsiklin startına qədər İBA üzvü qalan milli federasiyalar da ABŞ-dakı Olimpiadaya buraxılmayacaq. Milli olimpiya komitələri həmin federasiyaları öz üzvlüyündən çıxarmalıdır.

Amma atletika və boksun ardınca digər idman növlərinin də belə addım atması da istisna deyil. Mükafat vədi ilə çıxış edəcək beynəlxalq təşkilatların çoxalması isə BOK üçün böyük zərbə olacaq.

Qeyd edək ki, Paris-2024 Yay Olimpiya Oyunları iyulun 26-dan avqustun 11-dək keçiriləcək.

İdman.biz