Report.az
Qaşım Maqomedovun nəticəsi Azərbaycan taekvondosu üçün böyük uğurdur.
"Report" xəbər verir ki, bunu Azərbaycanın böyüklərdən ibarət taekvondo millisinin baş məşqçisi Məmməd Abdullayev deyib.
O, yığmanın Çinin Uşi şəhərində keçirilən dünya çempionatındakı nəticələrini dəyərləndirib:
"Qaşım Maqomedovun nəticəsi Azərbaycan taekvondosu üçün böyük uğurdur. Dünya çempionatı iki ildə bir keçirilir. İstərdik ki digər idmançılarımız da nəticə qazansınlar. Qaşım reytinqdə güclü rəqibləri üstələyərək bürünc medal qazandı. Qaşım qızıl medal da qazana bilərdi. Sona 5 saniyə qalmış cüzi səhvinə görə uduzdu. Qaşını məğlub edən idmançı finala çıxdı. Bu bir idmandır, nəticəyə görə sevinməliyik. Dünya çempionatında bürünc medal qazanmaq idmançı üçün böyük uğurdur".
Mütəxəssis 9 taekvondoçudan cəmi birinin medal qazanmasına da münasibətini bildirib:
"Heyətdə bəzi idmançılar nəticə qazanmaq üçün bir qədər gənc idilər. Bir neçə təcrübəli idmançı vardı ki, onlar da layiqli nəticə qazana bilərdilər. Amma yalnız Qaşım özünü doğrultdu. Digərləri müəyyən səhvlər üzündən medal qazana bilmədilər".
Qeyd edək ki milli üzvlərindən Qaşım Maqomedov mundialda bürünc medal sahibi olub. Azərbaycan dünya çempionatında 9 taekvondoçu ilə təmsil olunub.
