Report.az
Birləşmiş Ərəb Əmirliklərinin Füceyrə şəhərində keçirilən dünya birinciliyində bürünc medal qazanmaq Azərbaycanın yeniyetmə taekvondoçusu Saleh Heydərov (57 kq) üçün böyük motivasiyadır.
İdmançı bu barədə "Report"a açıqlama verib.
O, yarışla bağlı təəssüratlarını bölüşüb:
"Dünya birinciliyində iştirak etmək və bürünc medal qazanmaq həm qürurverici, həm də məsuliyyətlidir. Bu, mənim ilk dünya birinciliyim idi. Rəqabət çox yüksək idi, hər döyüş öz çətinliyi ilə yadda qaldı. Finala yüksələ bilməməyim əsasən təcrübəmin azlığı ilə bağlıdır. Amma qarşıma qoyduğum məqsəd uğrunda sonadək mübarizə apardım. Bu medal mənim üçün təkcə uğur deyil, həm də gələcək yarışlarda daha yüksək nailiyyət qazanmaq üçün böyük motivasiyadır".
Saleh Heydərovun sözlərinə görə, bu nəticənin əldə olunmasında mərhələli təlim-məşq toplanışlarının rolu böyük olub:
"Hər şey planlı şəkildə həyata keçirildi. Məşqçilərimizlə birlikdə mərhələli təlim-məşq toplanışları keçdik, fiziki və taktiki hazırlığa ciddi önəm verildi. Azərbaycan Taekvondo Federasiyası rəhbərliyinin göstərdiyi diqqət və qayğı bizə əlavə güc verdi. Federasiya tərəfindən yüksək səviyyəli hazırlıq proseslərində, eyni zamanda beynəlxalq yarışlarda iştirakımız üçün şərait yaradılmışdı. Bu dəstəyə görə təşəkkür edirəm. Bu il Serbiyada keçirilən ISF U-15 Gimnaziada İdman Oyunlarında, Niderlandın 52-ci açıq çempionatında bürünc medallara layiq görülmüşəm. İnanıram ki, növbəti yarışlarda daha uğurlu nəticələr əldə edəcəyəm".
