Idman.biz
Hamıya məlumdur ki, Azərbaycanda hər xarici mütəxəssis eyni dərəcədə isti qarşılanmır, xüsusilə də "Neftçi" kimi simvolik bir kluba rəhbərlik edirsə. Lakin ötən ilin iyulunda basketbol üzrə "Neftçi" klubunun sükanı arxasına keçən Vitaliy Stepanovski qısa müddətdə komandanın uğurlu çıxışları sayəsində həm oyunçuların etimadını, həm də azarkeşlərin hörmətini qazanmağı bacarıb.
İdman.Biz ukraynalı mütəxəssislə səmimi müsahibəni təqdim edir.
- Komanda üçün geridə qalan ili necə qiymətləndirirsiniz və yeni ildən nə gözləyirsiniz?
- Geridə qalan təqvim ili komanda üçün vacib, tarixi və bir çox cəhətdən həlledici oldu. Klub tarixində ilk dəfə avrokuboklarda iştirak etdi və layiqli oyun nümayiş etdirərək top-16 mərhələsinə yüksəlmək üçün real şans qazandı. Biz möhkəm təməl formalaşdırdıq: heyəti qurduq, həm komandanın ümumi güclü və zəif tərəflərini, həm də hər bir oyunçunun potensialını müəyyən etdik. Zədələrlə bağlı çətin anlar da oldu, lakin məhz bu məqamlar bizə inkişaf etməyə, daha sistemli və psixoloji baxımdan daha dayanıqlı olmağa kömək etdi.
Yeni ildən və mövsümün ikinci hissəsindən daha böyük irəliləyiş gözləyirəm: oyunlarda sabitlik, oyunçuların fərdi inkişafı və ən əsası, əsl komanda mədəniyyətinin formalaşması. Biz maksimum gücümüzü ortaya qoyaraq ən yüksək yerlər uğrunda mübarizə aparmaq və növbəti mövsümdə yenidən Avropa turnirlərində iştirak etmək hüququ qazanmaq istəyirik. Məqsədimiz təkcə "Neftçi"ni deyil, ümumilikdə Azərbaycan basketbolunu Avropa arenasında layiqincə təmsil etməkdir.
- Deyirlər ki, mental baxımdan komanda idman növləri azərbaycanlılara uyğun deyil. Siz bununla razısınızmı? Klubdakı azərbaycanlı oyunçuların çıxışı bu fikri təsdiqləyir, yoxsa təkzib edir?
- Bu fikirlə razı deyiləm. Mentalitet məhdudlaşdırıcı amil deyil, əsas rol məşq sistemi və oyunçular qarşısında qoyulan tələblərə məxsusdur. Hər şey zaman və düzgün qurulmuş piramida tələb edir – ən aşağı yaş qruplarından tutmuş peşəkar səviyyəyədək. Komanda idman növləri məsuliyyət və ümumi nəticə naminə işləməyi tələb edir və bu keyfiyyətlərin hamısını formalaşdırmaq və inkişaf etdirmək mümkündür.
Klubumuzdakı azərbaycanlı oyunçulara gəlincə, onlarda xarakter, inkişaf istəyi və məsuliyyəti üzərlərinə götürməyə hazır olduqlarını görürəm. Düzgün yanaşma, qarşılıqlı etimad və ardıcıl iş şəraitində onlar yüksək səviyyədə çıxış edə və güclü, rəqabətədavamlı komandanın ayrılmaz hissəsinə çevrilə bilərlər.
- Altı aylıq Azərbaycanda yaşadıqdan sonra "Azərbaycan" sözü sizdə hansı üç anlayışla assosiasiya olunur?
- Bu gün ölkə ilə bağlı düşüncələrim daha dərin və şəxsi xarakter alıb. Azərbaycan mənim üçün insanlar, ambisiyalar və inkişaf deməkdir. Böyük potensiala malik, sürətlə dəyişən, qarşısına yüksək hədəflər qoyan və xüsusilə idman sahəsində irəliləməyə can atan bir ölkə görürəm.
- Ölkənin hansı regionlarında olmusunuz və bu səfərlər nə ilə yadda qalıb?
- Komanda ilə birlikdə Gəncə və Şəkidə olmuşam. Şəki məni xüsusilə təbiəti, dağları və inanılmaz dərəcədə təmiz havası ilə çox təsirləndirdi.
- "Neftçi" deyəndə çoxları futbolu xatırlayır. Bu brendin basketbolla da assosiasiya olunması üçün nə qədər vaxt lazımdır?
- "Neftçi"nin insanların şüurunda təkcə futbol yox, həm də basketbol klubu kimi formalaşması üçün biz sabit şəkildə yüksək səviyyəli oyun göstərməli, həm ölkə daxilində, həm də beynəlxalq arenada uğurlar qazanmalı və güclü komanda mədəniyyəti qurmalıyıq.
- Basketboldan başqa həyatınızda nəyə yer var? Nə ilə maraqlanırsınız? Ailənizi daimi yaşamaq üçün Bakıya gətirmək planlarınız varmı? Əgər artıq buradadırlarsa, Bakı haqqında fikirləri nədir?
- Basketboldan əlavə, ümumilikdə idmana böyük marağım var, müxtəlif növlərin inkişafını izləyirəm. Həmçinin ailəmlə vaxt keçirməyi, oxumağı və öz üzərimdə işləməyi sevirəm.
Ailə mənim üçün ən böyük dəyərdir və onların həmişə yanımda olmasına çalışıram. Hazırda Bakıda mənimlə birlikdə olmaları məni çox sevindirir.
Həyat yoldaşım keçmişdə ciddi uğurlara imza atmış peşəkar voleybolçu olub. İdmançı kimi bir-birimizi iş məsələlərində həmişə anlayırıq və bu, məni xoşbəxt edir. Oğlum məktəbə, qızım isə uşaq bağçasına gedir. Bakı ilə bağlı təəssüratları müsbətdir: şəhər, mədəniyyət, insanlar və ümumi ab-hava onların xoşuna gəlir, yeni mühitə tədricən uyğunlaşırlar.
- Azarkeşlərlə ünsiyyət qurursunuzmu? Onlar basketbol "Neftçi"sində bəlkə də futbol komandasında tapa bilmədiklərini tapa biləcəklərmi?
- Bu, idmanın ən vacib tərəflərindən biridir. Ünsiyyət mütləq olmalıdır və daha da gücləndirilməlidir, çünki biz hər şeyi azarkeşlər üçün edirik. İstəyirəm ki, həm futbol, həm də basketbol "Neftçi"sinin azarkeşləri birləşsin, oyunlara gəlsin, matçlardan zövq alsın və müsbət enerji toplasın. Biz də onların sevinci üçün əlimizdən gələni edəcək, uğurlu nəticələr göstərməyə çalışacağıq. Hər kəsə xeyir və sülh arzulayıram.
