Turqay Zeytingöz: “Nörçöppinq”ə qarşı 70 xalı keçə bilmirsənsə…”

"Sabah" şansız bir şəkildə "Nörçöppinq"ə uduzdu".

Bunu İdman.bizə Azərbaycan Basketbol Federasiyasının idman direktoru Turqay Zeytingöz deyib.

O, "Sabah"ın FİBA Avropa Kubokunda "Nörçöpinq"ə 70:74 hesabı ilə uduzduğu matçı şərh edib. Funksioner bildirib ki, məğlubiyyətin bir neçə səbəbi var: "Sabah" doğma meydanda 70 xalı adlaya bilmədi. Bu, 2 səbəbdən alınmadı. Birincisi, 3 xallıq atışların cəmi 20 faiz dəqiq olması, digəri isə 9 sərbəst atışı qaçırmalarıdır. Öz meydanınızda "Nörçöppinq" kimi keyfiyyətli komandaya qarşı 70 xalı keçə bilmirsənsə, qələbə şansı da azalır. Təbii ki, komandamızın əsas hücumçusu Deandre Bolduinin son 2 oyunda iştirak etməməsini də unutmamalıyıq. "Sabah"ın FİBA Avropa Kubokuna şansız başlanğıc etdiyini düşünürəm. Onlar məğlub olduqları 2 oyunda rəqiblərindən 5 xaldan daha az geri qaldılar".

Zeytingöz "Sabah"ın qrupdan çıxmaq üçün riyazi şanslarının qaldığını bildirib: "Komandamız qalan 3 matçında qalib gələrsə qrupdan çıxa bilər. Təbii ki, bu asan olmayacaq. Xüsusi ilə Avropa Kubokunun formatını düşünsək, ən yaxşı 6 ikinci sırasına düşmək üçün hər bir oyunda qalib gəlməliyik. Məncə, Deandrenin dönüşü xal qazanmaq baxımından "Sabah"ı bir qədər rahatladacaq. Mental olaraq onların qazanacağı 1 qələbənin komandaya çox müsbət təsir edəcəyini düşünürəm. Üst-üstə məğlub olduqları üçün yorğunluq hiss olunur. Ümid edirəm ki, gələn oyunlarda qələbələr qazanılar və qrupdan çıxarlar".

Qeyd edək ki, "Sabah" oktyabrın 30-da keçirəcəyi növbəti görüşdə Bakıda "Spriou"nu qonaq edəcək.

Emin Ağa
İdman.biz