Turqay Zeytingöz: "Azərbaycanın hər iki milli komandasının uğurlu çıxış edəcəyinə əminəm."

"Həm kişi, həm də qadın millimizin yaxşı çıxış edəcəyini düşünürəm".

Bunu İdman.biz-ə Azərbaycan Basketbol Federasiyasının idman direktoru Turqay Zeytingöz deyib.

O, bu gün Bakıda start götürəcək basketbolun 3x3 növü üzrə Dünya kubokundan danışıb. Zeytingöz komandalarımızın yarışdakı şanslarını dəyərləndirib: "Kişilərin qrupunda Kanada və İngiltərə kimi dünya basketbolunda söz sahibi olan ölkələr var. Ona görə də bu gün onlar ən azı, bir qələbə qazanıb qrupdan çıxarsa, Dünya kubokuna qatılmaq üçün şanslarının olduğunu düşünürəm. Qadın komandamızın isə qrupdan birinci çıxa biləcəyinə inanıram. Bugünki oyunlar bizim üçün çox önəmlidir. Əgər bu gün yaxşı keçsə, sabah bir qalibiyyət də bizə bəs edəcək. Əlbəttə ki, matçların doğma azarkeşlərin də oynanılması bizim üçün əlavə motivasiyadır. İyunun sonunda Monqolustanda təşkil olunacaq həlledici yarışda hər iki komandamızın iştirak edəcəyinə ümid edirəm".

Zeytingöz ölkəmizdə qadın basketbolunun inkişafından da danışıb: "Qadın basketbolunda da federasiya olaraq ciddi işlər görürük. Burada Evren Alkayanın rəhbərliyi ilə formalaşan bir sistem var. Ancaq nəzərə almaq lazımdır ki, bu sahədə çox təzəyik. 2007-2008 təvəllüdlü idmançılardan başlayaraq, çox potensiallı basketbolçularımız var. Ötən il qatıldığımız Avropa seçmə mərhələsində oyunçularımız çox gənc və təcrübəsiz olduğu üçün uğurlu nəticə qazana bilmədik. Ancaq bu qızlar böyüdükcə yaxşı olacağını bilirəm. Ümid edirəm ki, yaxın gələcəkdə ölkəmizdə yaradılacaq Qadın Basketbol Liqası ilə bu sahəyə marağın daha da artmasına nail olacağıq. Hazırda biz yalnız kişi basketboluna, yaxud da milli komandaya fokuslanmamışıq. Federasiya olaraq basketbolun bütün sahələrinin inkişafı üçün çalışırıq".

Qeyd edək ki, basketbolun 3x3 növü üzrə Dünya kubokunun Bakıda keçirilən seçmə mərhələsinin oyunları "Sea Breeze"də baş tutacaq.

Aytac Sahəd
İdman.biz