Idman.biz
Azərbaycanın basketbol millisi Avropa çempionatının ilkin seçmə mərhələsinə geri sayımı başlayıb. Yığmamız artıq ilk raunddakı rəqiblərini tanıyır və onların arasında köhnə tanışlar da var. Baş məşqçi Tahir Bəxşiyev İdman.biz-ə verdiyi müsahibədə püşkün nəticələrini, hazırlıq planlarını və məşqçilik fəlsəfəsini bölüşüb.
– Avropa çempionatının ilkin mərhələsinin püşkünü dəyərləndirərdiniz?
– Rəqiblərimiz kifayət qədər güclüdür. Şimali Makedoniya hər zaman yaxşı basketbolla tanınıb. Lüksemburq isə son on ildə böyük irəliləyiş göstərib və əvvəllər asanlıqla məğlub etdiyimiz komanda deyil. İrlandiya ilə dəfələrlə qarşılaşmışıq. Ötən il dünya çempionatının seçməsində onlara qalib gələ bilmədik, amma mən həmişə nikbinəm. Düzgün hazırlaşsaq və istəkli olsaq, qələbə qazana bilərik.
– İlk oyunlar noyabrda keçiriləcək. Hazırlıq planınız varmı?
– İlkin plan yox idi, ona görə də kiminlə oynayacağımızı görmək üçün püşkatmanın nəticələrini gözləməli olduq. İndi məlumatları təhlil edəcəyik və toplayacağıq. Belə vəziyyətlərdə hər şey həmişəki kimi olur. Əsas odur ki, oyunçular 100 yox, 150 faiz güclə mübarizə aparsınlar.
- Son seçmə mərhələdə Kosovoya qalib gəldik. Qarşıdakı seçmə mərhələdə hansı nəticə bizim üçün məqbul olacaq?
- Oyundan-oyuna getməliyik, hər görüşdə qələbə qazanmağa çalışmalıyıq. Sonra nəticə gələcək. İndi rəqibləri yaxından öyrənəcəyik. Əgər biz irlandlarla az-çox tanışıqsa, o zaman digərlərinə daha yaxından nəzər salmalıyıq.
- Gəlin rəhbərlik etdiyiniz NTD klubundan danışaq. Mövsümə hazırlıq necə gedir?
- Artıq məşqlərə başlamışıq. Hazırda komandada üç legioner var, Hələ bütün legionerlər komandaya qatılmayıb. Yaxın günlərdə daha bir oyunçu qoşulacaq.
- Amerikalı Ladarius Marşal komandaya tarnsfer olunub. Başqa hansı möhkəmləndirmələri gözləyə bilərik?
- Əlimizdə olan dörd legioner transferindən əlavə, daha iki legioner transferini rəsmiləşdirməyi planlaşdırırıq. Mövsümə yerli oyunçuları cəlb etməklə siyahıda altı əcnəbi basketbolçu ilə başlayacağıq.
- Yeni mövsüm üçün hədəflər nədən ibarətdir?
- Mən həmişə demişəm və bundan sonra da deyəcəyəm ki, NTD iddialı klubdur. Bəli, ABL-in bir sıra komandalarının böyük büdcəsi var, bunu hamı bilir - "Sabah", "Neftçi", "Abşeron Lions" avrokuboklarda çıxış edəcək. Amma biz həmişə kuboklar üçün mübarizə aparmışıq, ona görə də bu planlarda heç bir dəyişiklik yoxdur. Bəli, çətin olacaq, amma çalışacağıq.
- Sözsüz ki, işlədiyiniz illər ərzində öz məşqçilik fəlsəfənizi inkişaf etdirmisiniz. Bunu formullaşdıra bildinizmi?
- Bir basketbolçu kimi məni məşqçilik karyeramda sadiq qaldığım istək idarə edirdi. Bu, qələbə qazanmaq üçün böyük bir istəkdir. Əsas odur ki, emosiyaya qapılmadan, ağılla oynayasan, amma qələbə əzmini itirməyəsən. Avropa çempionatında isə Finlandiya və Gürcüstan göstərdi ki, bu keyfiyyətə görə çox şeyə nail olmaq mümkündür, hətta Fransa, Serbiya kimi rəqibləri məğlub etmək olar. Bəli, yaxşı basketbol nümayiş etdirdilər, əla oyunçuları var. Lakin finlərlə gürcülərin yalnız daha çox istədikləri üçün qalib gəldiklərini söyləmək mümkün deyil. Əsas fərq meydandakı əzmkarlıq idi. Çoxları belə nəticəyə inanmırdı, çünki fransızlar və serblər favorit hesab edilirdi. Lakin bütün bunlara baxmayaraq, rəqiblər fədakarlıqları sayəsində qalib gələ bildilər. Bu, sübut edir ki, əsas olan adlar deyil.
Bəlkə bizdə də - Azərbaycan yığmasının rəqibləri daha güclü görünür - həm kağız üzərində, həm də statistikaya görə. Amma biz buna baxmamalıyıq. Biz meydana çıxmalıyıq, nə edəcəyimizi bilməliyik, tam gücümüzlə oynamalıyıq. Sonra nəticə olacaq. Amma ən əsası qələbə istəyi, meydanda hər santimetr üçün mübarizə aparmaqdır.
Zəki Feyzullayev
İdman.biz
