Tahir Baxşıyev: "Bu, məğlubiyyətə gətirib çıxardı"

Hücumda intizamlı oynaya bilmədik. Sport24.az xəbər verir ki, bunu NTD-nin baş məşqçisi Tahir Baxşıyev Azərbaycan Basketbol Liqasının XVIII turunda "Neftçi" ilə qarşılaşmadan sonra klubun mətbuat xidmətinə açıqlamasında bildirib.

Mütəxəssis matça yaxşı başlasalar da sonluğun istədikləri kimi alınmadığını vurğulayıb: "Üçüncü periodda Detrek 5 foldan sonra oyunu tərk etdi. Bu itki özünü göstərdi. Hücumda intizamlı oynaya bilmədik. Bu da məğlubiyyətə gətirib çıxardı. Əvvəlki oyunlarımıza baxsaq, daha çox xal buraxmışdıq. Bu gün rəqibə cəmi 76 xal verdik, amma məğlub olduq. Bu oyunu analiz etməliyik. "Sabah"la oyuna hazırlaşacağıq".

Baş məşqçi görüşün hakimləri ilə də fikirlərini bölüşüb: "Mən heç vaxt hakimlik barədə danışmıram. Və düşünmürəm ki, hakimlərin qərarları məğlubiyyətimizə səbəb oldu. Qərəz görmədim. Hakimlər bacardıqları kimi idarə edirlər. Hər kəs səhv edə bilər. Digər tərəfdən, basketbol təmaslı oyundur. Bu, voleybol deyil. Mən həmişə basketbolçulara oynamağa imkan verilməsinin tərəfdarı olmuşam. Görürəm ki, amerikalılar oyun zamanı bir-biri ilə danışırlar. Onlar tez-tez verilən foulara təəccüblənirlər. Müasir basketbolda oynamağa imkan verirlər. Buna baxmayaraq, hesab edirəm ki, hakimlərimiz də inkişaf edirlər. Hər şeyi birdən əldə etmək olmaz".

Qeyd edək ki, "Sərhədçi" İdman Mərkəzində baş tutan qarşılaşmada "Neftçi" NTD-yə 76:64 hesabı ilə qalib gəlib.