Sport24.az
"İstedadlı oyunçulardan qurulan komandayıq. Məşqçi heyətimiz də yüksək səviyyədədir". Sport24.az xəbər verir ki, bunu "Sumqayıt"ın basketbolçusu Demetrius Antonio Kortrez Leyk klubun mətbuat xidmətinə açıqlamasında deyib.
Komandanın yeni transferi öncə keçidindən danışıb: "Oyunçular arasında əla anlaşma var. Biz hazırda B qrupunun sonuncu pilləsində qərarlaşsaq da, hazırkı vəziyyətə görə o qədər də narahat deyilik. Çünki mövsüm uzundur. Heyət olaraq birgə çalışmalıyıq ki, nəticələrimiz yaxşı olsun".
Leyk komandanın məşqçi heyəti haqda yüksək fikirlər səsləndirib: "Azərbaycana gələnə qədər Ukrayna ilə Belarusda rusiyalı və belaruslu məşqçilərin rəhbərliyi altında oynamışam. İş elə gətirdi ki, burada da rusiyalı mütəxəssisin çalışdırdığı komandadayam. Aleksandr Mixaylovun işindən razıyam. O, bizə öz oyun fəlsəfəsini aşılaya bilib. Mixaylovun başçılığı altında inkişaf edirik".
Demetrius Azərbaycan haqda da fikirlərini bölüşüb: "Çox gözəl və təhlükəsiz ölkədir. Vaxtımın daha çox hissəsini Bakıda keçirirəm. Amma Sumqayıt da paytaxtdan heç də geri qalmır. Burada hər şey ürəyimcədir".
Qeyd edək ki, "Sumqayıt" V turdan sonra 1 qələbə qazanıb. Onlar 6 xalla B qrupunda sonuncudurlar.
