Sport24.az
"Biz bu gün oynamalı oyunumuzu göstərmədik". Sport24.az xəbər verir ki, bunu "Şəki"nin baş məşqçisi Bedri Meriç Azərbaycan Basketbol Liqasının XIII turunda "Sumqayıt"la qarşılaşmadan sonra deyib.
O, 8 oyunluq qələbə seriyasının qırılmasına üzülüb: "Açığı, oyunu biz uduzduq, onlar qalib gəlmədi. 8 oyunluq qələbə seriyamız vardı. Xüsusən, hakim heyəti ilə bağlı bir söz söyləmək istəyirəm. Hörmət qazanılır. Bu komandanın qarşılıqlı hörmət görməsi lazımdır. "Sabah"la eyni sayda qələbə qazanmışıq. Bu günədək 10 matçda qalib gəlmişik. Ancaq bu hörməti görmürük. Hər matçda eyni problemləri yaşayırıq. Mən qalib gəldiyim zaman da bunu hakimlərə söyləmişdim. Ümid edirəm ki, artıq hamı bu məğlubiyyətimizlə rahatladı. Qələbə seriyamız bitdi. Biz mükəmməl komanda olmaya bilərik, ancaq mübariz bir komandayıq. Bunu da növbəti oyunlarda göstərəcəyik".
Türkiyəli mütəxəssis hakim idarəçiliyində səhvlərin olduğunu da deyib: "Bizim oyunçularımız faul edə bilər. Amma eyni hərəkətlərə görə fitin rəqib komanda əleyhinə çalındığını düşünmürəm. 26 dəqiqəyə bir komandaya cəmi 4 faulun verilməsi mümkün deyil. Bu, normal hal deyil. Açığı, lider və ya 2-ci olmaq çox önəmli deyil. İstənilən halda, pley-offa gedəcəyik. Mən əvvəl də söyləmişdim ki, liderlik dəyişə bilər. Çünki qrupumuzda "Ordu", "Gəncə" kimi yaxşı komandalar var. Biz oyunumuzla hörməti qazanmış komandayıq. Sadəcə, hamıdan eyni hörmətin bizə olunmasını istəyirik".
Qeyd edək ki, "Şəki" "Sumqayıt"a 93:98 hesabı ilə uduzub.
