"Ötən görüşlərlə müqayisədə oyunumuz daha da təkmilləşib, inkişaf edib".
Bunu İdman.bizə "Sabah"ın basketbolçusu Maykl Holton deyib.
Amerikalı legioner FİBA Avropa Kubokunda bu gün Bakıda İsveçin "Nörçöppinq" klubuna qarşı oynayacaqları matç öncəsi fikirlərini açıqlayıb. O bildirib ki, rəqib yaxşı komandadır: "Çempionlar Liqasında bizi məğlub ediblər. Onlar hörmətə layiqdirlər. Amma biz də keçirdiyimiz oyunlarla yaxşı təcrübə qazanmışıq. Qarşılaşmaya daha yaxşı hazırlaşmışıq. Artıq bütün taktiki gedişlər üzərində işləmişik. İlk matçla müqayisədə daha yaxşı oyun sərgiləyəcəyik. "Nörçöppinq"i məğlub etmək üçün bütün gücümüzü ortaya qoyacağıq".
Holton azarkeşləri də oyuna səsləyib: "Onlar ilk oyunda bizi tək qoymadılar. Dəstəklərini əsirgəmədilər. Bu gün də onları gözləyirik. Dəstəklərinə ehtiyacımız var".
Qeyd edək ki, "Sabah" – "Nörçöppinq" matçı Bakı İdman Sarayında keçiriləcək. Oyun saat 19:00-da başlayacaq.
Emin Ağa
İdman.biz