Idman.biz
"Sabah" basketbol klubunun baş məşqçisi Lazar Spasiç Türkiyənin "Trabzonspor" komandası üzərində qazanılan qələbəni (91:72) dəyərləndirib.
İdman.Biz xəbər verir ki, serbiyalı mütəxəssis oyundan sonra keçirilən mətbuat konfransında uğurlu nəticədən məmnunluğunu ifadə edərək azərbaycanlıların komandaları ilə qürur duymalı olduqlarını söyləyib:
"Bütün azərbaycanlıları təbrik edirəm. Onlar komandaları ilə qürur duymalıdırlar. Bütün basketbolçularımı da təbrik edirəm. Çox ciddi komandayıq və böyük işlər görürük. Bu qələbə bizim üçün çox xoş hisslər yaradır".
Spasiç rəqibin təhlili və qarşılaşmaya hazırlıq prosesindən də danışıb. O, komandanın inkişafında səhvlər üzərində aparılan işin əhəmiyyətini qeyd edib, məşqçilər heyətinə təşəkkürünü çatdırıb:
"Hər oyundan sonra çatışmazlıqlarımız üzərində çalışırıq. Bu yolu keçərək böyüyüb inkişaf edirik. Düzdür, vaxtımız çox olmur, lakin "Trabzonspor"u təhlil etmək üçün kifayət qədər vaxtımız oldu. Gördükləri işə görə məşqçilər heyətimizə təşəkkür edirəm".
