Rimas Kurtinaytis: "20 il əvvəl Azərbaycanda işləyərkən belə deyildi"

"Sabah" ardıcıl 2-ci dəfə Azərbaycan Basketbol Liqasında 2023/2024 mövsümünün qalibi olub. Sport24.az xəbər verir ki, komandanın litvalı baş məşqçisi Rimas Kurtinaytis çempionluq sevincini jurnalsitlərlə bölüşüb.

- Uzun müddətdən sonra Azərbaycan döndünüz. İlk mövsümdəcə yenə çempion titulunu qazandınız. Hansı hisslər keçirirsiniz?

- İlk növbədə "Xəzri"ni qeyd etmək istərdim. Finala vəsiqə qazanan komanda sonadək mübarizə apardı. Bu gün qələbə qazanmaq imkanları da var idi. Amma sona yaxın biz vəziyyəti öz xeyrimizə dəyişə bildik. Heç də asan qələbə olmadı. 20 il əvvəl Azərbaycanda işləyərkən belə deyildi. Yığmanın oyunçuları "Qala"da toplaşmışdı və biz liderlik edirdik. Bu mövsüm çempionat çox maraqlı keçdi, bütün rəqiblər bir-birini məğlub etmək gücündə idi. Bu, müntəzəm çempionatda və ölkə kubokunda da özünü göstərirdi. Şadam ki, bu gün qələbə qazana bildik.

- Çempionluqda əsas rolu nə oynadı?

- 3 ay ərzində basketbolçulardan komanda təşkil etməyə nail oldum. Əgər fikir verdinizsə, biz komanda kimi oynayırdıq, hərə öz rolunu yaxşı yerinə yetirirdi. Şirzad Şirzadovun MVP seçilməsinə çox sevindim. O, bu gün müdafiə və hücumda çox yaxşı çıxış etdi. Mən gəldikdən sonra klub gündə 2 dəfə məşq etməyə başladı. Bəzən bizim oyunçular buna görə şikayətlənirdilər. Amma bunun nəticəsi finalda öz sözünü dedi. Çox yorulsaq da, "Xəzri"dən daha gümrah idik.

- Növbəti mövsümdə Avropada qarşıya hansı məqsədlər qoyulacaq?

- Avrokuboklara gəlincə, heyətdə bəzi dəyişikliklər edəcəyimizi düşünürəm. Daha da güclənməliyik. Növbəti mövsümdə büdcəmiz çoxalacaq. FİBA Çempionlar Liqasında çıxış edəcək komanda qurmalıyıq. Orada İspaniya və Tükiyənin güclü klubları çıxış edir. Bunun üçün heyəti gücləndirmək lazımdır. Amma indi bir şeyi deyə bilərəm. Biz qələbə qazanmışıq və bu bayramın sevincini yaşayırıq. Gələcək planlarla bağlı sonra suallara cavab verəcəm.