"Sumqayıt"ın legioneri: "Bakı mənim üçün “kiçik Nyu-York”dur"

"Sumqayıt"ı çox sevdim". Sport24.az xəbər verir ki, bunu "Sumqayıt"ın basketbolçusu Eli Lourens klubun mətbuat xidmətinə açıqlamasında deyib.

Amerikalı forvard komandaya adaptasiyasından danışıb: "Özümü burada ailənin bir üzvü kimi hiss edirəm. Baş məşqçimiz Vadim Kuramşın döyüşkən kollektiv formalaşdırıb. Hər şeydən razıyam və burada olduğuma görə şadam".

Lourens məhsuldarlıq yarışında komanda yoldaşı Zayon Yanqla rəqabətindən də danışıb: "Bizim aramızda heç bir rəqabət yoxdur. Bura basketbol oynamağa və xal qazanmağa gəlmişik. Həm Yanq, həm də mən meydana çıxıb sadəcə öz işimizi görürük. Məqsəd qələbə qazanmaq və "Sumqayıt"ı turnir cədvəlində üst sıralara daşımaqdır. Yanqın bir oyunda məndən çox xal toplamasına qıcıqlanmıram".

Eli Sumqayıtla Bakını da müqayisə edib: "Sumqayıtı çox bəyənirəm. Hərçənd Bakı ilə bu şəhər arasında müəyyən fərqlər var. Bakı mənim üçün "kiçik Nyu-York"dur. Bu şəhərdə çox insan yaşayır, daim də tıxacda qalırsan. Sumqayıt daha sakit və daha rahat şəhərdir. Burada həyatdan həzz alıram".

Lourens komandanın hədəflərindən də danışıb: "Məqsəd pley-offa yüksəlməkdir. Hər halda, turnir cədvəlində heç də pis mövqedə qərarlaşmamışıq. Qarşıda bizi "Gəncə" ilə oyun gözləyir. Mütləq qalib gəlməliyik".

Qeyd edək ki, "Sumqayıt" B qrupunda 19 xalla turnir cədvəlində dördüncü pillədə qərarlaşıb.