"Sumqayıt"ın baş məşqçisi: "Onun yeri görünür"

"Məqsədimiz pley-offa vəsiqə qazanmaqdır". Sport24.az xəbər verir ki, bunu "Sumqayıt" basketbol komandasının baş məşqçisi Vadim Kuramşın deyib.

Klubun mətbuat xidmətinə müsahibə verən mütəxəssis mövsümün gedişində baş məşqçi təyin olunması ilə bağlı danışıb:

"Hər şeydən əvvəl mənə etimad göstərən klub rəhbərliyinə təşəkkür edirəm. Hərçənd bu vəzifəyə gələndə komanda B qrupunda sonuncu pillədə idi. İndi isə inamla turnir cədvəlinin ortasında qərarlaşmışıq. Matçlarda topladığımız xallar və qazandığımız qələbələr çox yaxşı kollektiv olduğumuzu göstərir. Baş məşqçi təyin olunduqdan sonra heyətin bütün legionerlərini dəyişdim. Təəssüf ki, transfer əməliyyatını limit problemi ilə üzləşdiyimizə görə sona qədər başa çatdıra bilmədim. İndi sərəncamımda cəmi 4 legioner var. Halbuki, 5-cini də gətirə bilərdik. Sizi əmin edirəm, bunu etsəydik, biz qrupda ilk pillə uğrunda mübarizə aparardıq".

O, "Sumqayıt"ı ötən mövsümlə müqayisə edib:

"Bu komanda daha yaxşı təsir bağışlayır. Məncə, indiki heyət daha güclüdür. Amma ötənilki kollektivdən Roderik Smiti indi sıralarımızda görmək istəyərdim. Onun yeri görünür. Smit çempionata damğa vuran oyunçulardan idi. Təəssüf ki, buraya qayıtmadı və karyerasını Meksikada davam etdirmək qərarına gəldi".

Baş məşqçi Azərbaycan Basketbol Liqasının ən məhsuldar komandası olmaları barədə də fikirlərini bölüşüb:

"Oyunda yüksək xallar toplamağı bacarırıq. Amma istərdik ki, yaxşı da müdafiə olunaq. Bu yöndə problemlərimiz var. Amma bunun da səbəbləri məlumdur. Ən əsası legionerləri rotasiya edə bilmədiyimizdən belə çətinliklə üzləşirik. Pley-off mərhələsində hansı komanda ilə qarşılaşacağımız elə də böyük önəm kəsb etməyəcək. Məqsəd qalib gəlib pley-offa çıxmaqdır".