Sport24.az
"Bu bizim üçün vacib qələbə idi". Sport24.az xəbər verir ki, bunu "Sumqayıt"ın baş məşqçisi Vadim Kuramşın Azərbaycan Basketbol Liqasının XVI turunda "Lənkəran"la qarşılaşmadan sonra klubun mətbuat xidmətinə açıqlamasında deyib.
Mütəxəssis 88:83 hesabı ilə qalib gəldikləri matçı şərh edib:
"Həqiqətən də oyun çox gərgin keçdi. Nəzərə alaq ki, həyətimizdə ciddi itki var idi. Səhhətində problem yaşadığına görə Eli Lourensi Lənkərana gətirə bilmədik. Məcburiyyətdən 3 əcnəbi və 2 yerli basketbolçu ilə oynadıq. Uşaqlar belə çətin vəziyyətdə bir-birinə dəstək oldu. Xüsusən də ilk hissədə Zaur Quşanov 4 dəfə dəqiq "üçlük" atmaqla komandanı arxasınca daşıdı. Fasilədən sonra isə əsas snayperimiz Zayon Yanq yükü öz çiyninə götürdü. O, bu gün 29 xal yığdı və lazım olan anda hesab arasında fərqi artırdı".
Mütəxəssis qələbə münasibətilə komandasını təbrik edib:
"Oyunçularıma qəhrəman kimi döyüşdüyünə görə minnətdaram. Sevindirici haldır ki, "Lənkəran"ı ardıcıl 3-cü oyunda da məğlub etdik. Qələbə seriyasını davam etdirmək üçün "Ordu"ya da qalib gəlib 4-cü pillədəki mövqeyimizi möhkəmləndirmək istəyirik".
Qeyd edək ki, "Sumqayıt" turnir cədvəlində 22 xalla dördüncüdür.
