Sport24.az
"Məğlub olduğumuz üçün kədərliyik. Çünki, "Naxçıvan" çox yaxşı komandadır və çox yaxşı da baş məşqçisi var". Sport24.az xəbər verir ki, bunu "Sərhədçi"nin baş məşqçisi Evren Alkaya "Naxçıvan"a məğlubiyyətdən sonra deyib.
Türkiyəli mütəxəssis rəqibə qarşı pis oynamadıqlarını bildirib:
"Yenə də "üçlük" səviyyəmiz aşağıdır. Superliqa səviyyəsində "üçlük" atışlarımız sadəcə 4 əcnəbi basketbolçu ilə olarsa, matçlar belə vəziyyət yaranar. Həm məğlub olacağıq, həm də ən az 35 faizin üstündə atmaq lazımdır. Amma biz 24 faizdə qaldıq. "Naxçıvan" kimi komandanı 68 xalda saxlamaq çox önəmli bir müdafiə bacarığıdır. Sadəcə, biz çox bəsit xallardan uduzduq. Bu gün istədiyimiz qalibiyyəti ala bilmədik".
Baş məşqçi vurğulayıb ki, kubok matçı ilə birgə son 3 oyundur məğlub olurlar:
"Pley-off oyunlarına az qalıb. Amma komandamın pis oynadığını deyə bilmərəm. Daha yaxşı olacağıq. Antoni özünü yaxşı hiss etmədiyi üçün heyətə sala bilmədik. Buna rəğmən "Naxçıvan"a, "Sabah"a və "Gəncə"yə qarşı başa-baş oynadıq. Kədərliyik. Pley-off-lara qədər hər şey düzələcək".
Qeyd edək ki, martin 15-də Azərbaycan Basketbol Liqasının XVIII turu çərçivəsində "Sərhədçi" "Naxçıvan"a 68:66 hesabı ilə uduzub.
