Sport24.az
"Oyun bir qədər əsəbi alındı". Sport24.az xəbər verir ki, bunu "Quba"nın baş məşqçisi Şəhriyar Əsgərov deyib.
Mütəxəssis Azərbaycan Basketbol Liqasının XX turunda "Ordu"ya məğlubiyyətin səbəblərini açıqlayıb:
"Matçın əvvəllərində hesabda önə keçsək də, sonradan tempdən düşdük. Əsas oyunçumuzun biri zədə səbəbindən oynamadı. Bərabərsəviyyəli oyun getdi. Sadəcə atışlarda səhv etdik. Doğrudur, səhvlərimizi hardasa düzəltdik, amma sonda 9 xallıq fərqlə uduzduq. Müntəzəm mövsümün son oyunu idi. Məncə, pis alınmadı. Bəzi oyunçulara istirahət verdik, gənclər şans gördü. Bütün oyunçular yaxşı oynadı. Kameron Consa qarşı çox sərt müdafiə olsa da, istədiyi xalları yığdı".
O, bildirib ki, bu görüşdə müəyyən məsələlər də ortaya çıxıb:
"Pley-inn mərhələsində böyük ehtimalla "Ordu" ilə qarşılaşacağıq. Yaxşı oldu ki, yenə də öz oyunçularımızı sınadıq. Komandadan razıyam. Oyunçuların istədiyi alınmasa da, var güclərini meydanda qoydular. Rəqibimiz "Ordu" olarsa, həmin görüşə də yaxşı hazırlaşacağıq. Fikrimcə, həmin görüşdə meydanda tamam başqa komanda görəcəyik".
Qeyd edək ki, matç "Quba"nın 88:97 hesablı məğlubiyyəti ilə yekunlaşıb.
