Sport24.az
"Bu gün oyuna qələbə üçün çıxacağıq. Sport24.az xəbər verir ki, bunu "Quba"nın baş məşqçisi Şəhriyar Əsgərov klubun mətbuat xidmətinə müsahibəsində deyib.
Təcrübəli mütəxəssis ABL-in X turu çərçivəsində "Ordu" ilə oyun öncəsi fikirlərini açıqlayıb: "Komandalar heyətlərini gücləndirib. Hər biri özünün çatışmayan cəhətini düzəltməyə çalışıb. Yəqin ki, "Ordu" da bu müddətdən istifadə edib və heyətinə yeni oyunçular qatıb. Biz bu gün qələbə qazanmaq istəyirik. Oyun hər şeyi göstərəcək".
Əsgərov mübarizə apardıqlaqları B qrupunu da dəyərləndirib: "Üçhakimyətlilik davam edir. "Şəki", "Gəncə" və biz bir oyun az keçirmişik. "Ordu"nun "Gəncə" üzərində qələbəsi də var, amma bunu sensasiya saymıram. Bilirsiz, "Gəncə" deyildiyi kimi güclü komanda deyil. Biz o komanda ilə üç hissə bərabər səviyyədə mübarizə apardıq. Sadəcə sonda oyunçuların yorğunluğu öz sözünü dedi. Onların heyəti isə genişdir, rotasiya edə bilirlər. Bizdə bu sarıdan yenə problem ortaya çıxa bilər. Çünki heyətimizi genişləndirə bilməmişik. Yalnız Fikrət Ələkbərovu istisnadır. Onun komandaya gəlişi işimizi xeyli asanlaşdıracaq. O, sevdiyim, çox yaxşı və ağıllı oyunçudur. Komandadakı çatışmazlığı Fikrətin gəlişi ilə də aradan qaldırmağa çalışacağıq".
Baş məşqçi uzun fasilələrin bəzən oyun ritminə də təsir etdiyini də vurğulayıb. O bildirib ki, bu, labüd idi, olmalıydı: "Hansı komanda bu tətildən yaxşı istifadə edə bilibsə, qalib gələcək. Çempionatın növbəti mərhələsinin daha maraqlı olacağını düşünürəm. Sözsüz ki, biz də liderlik üçün çalışacağıq. Heyətimiz pis deyil. Müəyyən uğurlar qazanmaq üçün mübarizə aparacağıq".
Qeyd edək ki, "Ordu" – "Quba" qarşılaşması bu gün saat 16:30-da başlayacaq.
