Sport24.az
"Rotasiyadan istifadə edərək oynamağa çalışdıq". Sport24.az xəbər verir ki, bunu "Gəncə"nin baş məşqçisi Halil Atlı Azərbaycan Basketbol Liqasının XVIII turunda "Ordu" ilə oyundan sonra klubun mətbuat xidmətinə deyib.
O, komandasının 84:74 hesablı qələbəsi ilə bitən matçı şərh edib: "Çox çətin dövrdən keçirik. Ardıcıl oyunlara çıxırıq. Yaxın günlərdə bizim üçün vacib olan daha bir matç olacaq. "Ordu" təhlükəli rəqibdir. Bu gün oyuna biz yaxşı başladıq".
Baş məşqçi komandanın tapşırıqlara uyğun hərəkət etdiyini vurğulayıb: "Basketbolçulara öncədən verdiyimiz tapşırıqları meydanda yaxşı yerinə yetirdilər. Görüşün irəliləyən bölümündə rəqib də qarşılıq verdi. Amma biz oyunun qırılma nöqtəsinə gəlməsinin qarşısını ala bildik. Nəticədə də qalib gəldik. Azarkeşlərimizə minnətdarlığımı çatdırıram. Bizi yenə dəstəksiz qoymadılar. Onların dəstəyi bizim üçün çox önəmlidir. Ən yaxşı şəkildə çempionatı başa vuracağıq".
Qeyd edək ki, qərb təmsilçisi 18 turdan sonra 32 xalla turnir cədvəlinin lideridir.
