Sport24.az
"Əsas oyunçumuz Ceylon Şou sıralarımıza geri döndüyündən cəmi 1 məşqdə özünü sınamaq şansı olmuşdu". Sport24.az xəbər verir ki, bunu "Abşeron"un baş məşqçisi Erhan Toker deyib.
O, Azərbaycan Basketbol Liqasında NTD-yə məğlubiyyəti dəyərləndirib. Toker bildirib ki, bəzi oyunçuları istənilən oyunu göstərməyiblər: "Şou toparlanıb oynamağa çalışdı. Gənc oyunçularımız Məhəmməd Hüseynli ilə İsmayıl Abdullayev isə ilk yarını pis təsir bağışladılar. Rəqib onları təzyiq altında saxladı və uğursuz atışlardan sonra xal fərqi yaranmağa başladı. Bu, NTD-də özgüvəni artırdı, bizdə isə əksinə oldu. Mental olaraq çöküş yaşadıq. Sona doğru rəqibin etdiklərinə reaksiya verməyə başladıq. Məhəmməd Hüseynli yaxşı oynamağa başladı. Həm müdafiədə, həm də hücumda bizə fayda verirdi. Buna baxmayaraq fərqi qapada bilmədik və məğlub olduq".
Baş məşqçinin sözlərinə görə, məğlubiyyətin digər bir səbəbi yeni ilin ilk ayında ardıcıl oyunların keçirilməsidir: "İstədiyimiz kimi məşq etməyə zamanımız yetmir. Yəni nələrisə dəyişdirəcək, inkişaf etdirəcək vaxtımız çox olmur. Heç nə edə bilmərik. Mövsümün bu hissəsi çətin oldu bizim üçün. Bir də bir məsələ haqqında fikir bildirmək istəyirəm. Komandamız gənclərin olduğu, aşağı büdcəli komandadır. Bizə sanki yuxarıdan aşağı baxırlar. Mən elə düşünürəm".
Erhan Toker hakim qərarlarına da münasibət bildirib: "Hakimlər tərəfindən də verilən qərarlarda bunu hiss edirəm. Yanılada bilərəm. Bu oyunda biz pis oyun sərgiləyə bilərik, amma matçın çox da yaxşı idarə edildiyini deyə bilmərəm. Sanki bizim əleyhimizə çox qərar verildi. Bunu kimsə bilə-bilə edir demirəm. Sadəcə bariz şəkildə bizim lehimizə olan foullarda istədiyimiz qərar verilmirdi. Bu bəlkə də, bizim oyunçularımızın bədən dilindən qaynaqlanır. Hakimləri bu da çaşdıra bilər. Bütün bunları kənara qoysaq deyə bilərəm ki, komandamız toparlanacaq və yenidən qələbələr qazanacaq. Bu matça görə rəqib NTD komandasını təbrik edirəm".
Qeyd edək ki, "Abşeron" NTD-yə 77:87 hesabı ilə uduzub.
