Sport24.az
"Belə oynadığımız zaman, qələbələr də gəlir". Sport24.az xəbər verir ki, bunu NTD-nin basketbolçusu Tayri Boykin klubun mətbuat xidmətinə açıqlamasında deyib.
Bakı təmsilçisinin amerikalı legioneri Azərbaycan çempionatının XI turunda "Abşeron"la oyunu şərh edib:
"Bu oyundan zövq alırdıq. Biz məşqlərdə çox çalışırıq. Komanda kimi birlikdə inkişafa davam edəcəyik. İnanıram ki, qarşıda bizi böyük uğurlar gözləyir. Növbəti rəqibimiz "Naxçıvan"dır. Məşqçilər oyuna bizi çox yaxşı hazırlayıblar. Bilirik ki, "Naxçıvan" güclüdür və yaxşı oyunçuları var. Bizim üçün prioritet güclü tərəflərimizdən istifadə etməkdir. Bu halda hər bir komandaya qarşı rəqabət apara bilərik. Məşq həftəsi isə çox yaxşı keçdi".
26 yaşlı basketbolçu NTD-ə keçidindən də danışıb:
"Keçidim çox tez baş verdi. Məşqçilər menecerimlə əlaqə saxladı və biz demək olar ki, dərhal qərar verdik. Klubun mənə güvəndiyinə və bu imkanı verdiyinə görə minnətdaram. NTD böyük tarixə malik güclü klubdur. Komandanın əvvəlki nəticələrini yenidən göstərməsi üçün əlimdən gələni edəcəm. Başa düşürük ki, mövsümün ilk yarısı gözlədiyimiz kimi keçmədi. Amma bunu artıq arxada qoymuşuq. Komandanın heyəti yenilənib. Oyunçular bir-birini yaxşı başa düşməyə başlayıblar. Məşqçilər yeni transferlərin komandanın oyun üslubuna tez uyğunlaşması üçün böyük iş görüblər. Qələbələr üçün hazırlaşırıq".
Boykin bildirib ki, indi əsas məqsədi komandanın uğur qazanması üçün əlindən gələni etməkdir:
"Hər dəfə meydana çıxanda maksimum bacarığımı ortaya qoyuram. Komandada eyni səviyyədə olan basketbolçularla oynamaq böyük xoşbəxtlikdir. Biz bir-birimiz, ailələrimiz və azarkeşlərimiz üçün ən yaxşı oyunu nümayiş etdirmək üçün çox çalışırıq".
Qeyd edək ki, "Abşerona"a 87:77 hesabı ilə qalib gələn NTD A qrupunda 13 xalla sonuncusudur.
