Idman.biz
"Çox çətin mövsüm keçirdik".
Bunu İdman.biz-ə "Neftçi"nin basketbolçusu Amil Həmzəyev deyib.
Klubunun kapitanı Azərbaycan Basketbol Liqasının finalında "Sabah"a məğlub olmalarını şərh edib. O bildirib ki, komanda uğurlu nəticə qazanmaq üçün maksimumunu ortaya qoyub: "Mövsümə çox pis başlasaq da, sonradan toparlana bildik. İlboyu ikinci, üçüncü yerdə gedən komandalar bura qədər gəlib çıxa bilmədi, ancaq biz finala qədər gəlməyi bacardıq. "Neftçi"ni layiq olduğu yerə nəhayət ki, üçüncü mövsümdə çıxara bildik. "Sabah" avrokuboklarda iştirak etdiyi üçün büdcə fərqimiz var. Buna baxmayaraq, layiqli oyun keçirdik. Düşünürəm ki, gələn il büdcə baxımından bərabərlik təmin olunarsa, biz də daha yaxşı oyun göstərərik. Məncə, artıq "Neftçi" üçün də avrokuboklara getmək vaxtıdır".
34 yaşlı basketbolçu mövsümdə çıxışlarını da dəyərləndirib: "Bizim transfer haqlarımız erkən bitdi, legionlərimizdən biri finallardan öncə şəxsi səbəblərdən klubu tərk elədi. Rotasiyalarımız az oldu, özüm də bu mövsüm xeyli zədələrlə "boğuşdum". Məşqçi məndən istifadə etməyə çalışsa da, çox oynaya bilmirdim. Rotasiyada çətinliklərə baxmayaq, çox yaxşı mübarizə apardıq. Xüsusən də, ilk dörd ayı. Final seriyasına gəldikdə, ilk başda bizdə inam yox idi ki, "Sabah"a qalib gələ bilərik. Üçüncü oyunda qələbə qazandıqdan sonra inam yarandı və o güvənlə dördüncü oyunda qalib gəldik. Beşinci matçda isə müəyyən qədər arxayınlıq yarandı. Ümumilikdə isə final seriyası çox yaxşı keçdi".
Qeyd edək ki, finalda ilk dəfə oynayan "Neftçi" mövsümü gümüş medalla başa vurub.
Aytac Sahəd
İdman.biz
