“Neftçi”nin kapitanı: "Çempion olmaq və ölkəmizi avrokuboklarda təmsil etmək arzusundayıq"

"Abşeron" favorit sayılmasa da, pley-offlara fərqli hazırlaşmışdı".

İdman.biz xəbər verir ki, bunu AZƏRTAC-a açıqlamasında Azərbaycan Basketbol Liqasında finala yüksələn "Neftçi" komandasının kapitanı Amil Həmzəyev deyib.

O, yarımfinalda məğlub etdikləri "Abşeron" komandasının meydanda əsl xarakter göstərdiyini bildirib: "Rəqibin heyətində yer alan azərbaycanlı gənc oyunçular yaxşı mübarizə apardılar. Onları təbrik edirəm. Seriyanın birinci matçı daha çətin keçdi. Görüşün sonlarında rəqibin səhvi və bəxt amili bizə kömək oldu. Sonrakı qarşılaşma isə bizim üçün nisbətən rahat alındı".

Azərbaycan millisinin də kapitanı olan basketbolçu "Neftçi"nin mövsümə uğursuz başlamasının səbəbini belə izah edib: "Mövsümün əvvəlində düzgün transferlər edilməmişdi. Daha sonra 5 legioner oyunçu göndərildi. Onların yerinə gələnlərə uyğunlaşmaq üçün vaxt lazım oldu. Mövsümə 6 məğlubiyyətlə başlamışdıq. Ardınca 11 qələbə qazandıq və cəmi 3 dəfə uduzduq. Qalibiyyətlərin davamı pley-off mərhələsində də gəldi. Əgər mövsümün əvvəlində bunu etsəydik, müntəzəm sezonu fərqli pillədə bitirə bilərdik. Lakin üçüncü yer də bizi pley-offa apardı".

34 yaşlı basketbolçu "Sabah"la keçirəcəkləri final oyunları barədə də danışıb: "Üçüncü dəfə "Sabah"la finalda üz-üzə gələcəyəm. Daha əvvəl "Gəncə" və "Xəzri"nin heyətində bu komandaya qarşı oynamışam. Rəqibin yaxşı heyəti və güclü məşqçilər korpusu var. Azərbaycanı Avropada layiqli şəkildə təmsil ediblər. Çətin olacaq. Lakin çempion olub, ölkəmizi avrokuboklarda təmsil etmək istəyirik".

Qeyd edək ki, "Sabah"la "Neftçi" arasında ilk final qarşılaşması mayın 2-də Bakı İdman Sarayında keçiriləcək.

İdman.biz